Shpërthen makina përballë Parlamentit. Vazhdojnë hetimet...

• Grupi i ekspertëve hedh dyshime se shpërthimi i fuoristradës, së parkuar mbrëmë përballë godinës së Parlamentit mund të jetë provokuar nga eksplozivi. Nuk përjashtohet mundësia e ndonjë defekti te mundshëm në baterinë e makinës.

TIRANE- Një grup hetimor vazhdon hetimet mbi shpërthimin e fuqishëm që ndodhi mbrëmjen e së mërkurës në automjetin e parkuar përballë godinës së Parlamentit të Shqipërisë, në Tiranë.

Automjeti tip "Fuoristradë” me targa Tr 38-38 M, ishte parkuar në bulevardin “Xhorxh Bush” afër godinës së Shoqatës së të Përndjekurve Politikë në Tiranë, dhe disa metra larg lulishtes së Parlamentit, në krahun tjetër të rrugës.

Shpërthimi që ndodhi rreth orës 23.00 dhe ka tronditur banorët ë pallateve pranë Godinës së Parlamentit dhe është dëgjuar deri në qendër të kryeqytetit.

Në vendngjarje mbërritën edhe shërbimet e Zjarrfikëses për shuarjen e flakëve të zjarrit në automjet.

Policia bëri të ditur se veç dëmeve materiale, nuk ka patur të lënduar.

Nga shpërthimi janë dëmtuar disa automjete që ishin parkuar pranë fuoristradës, si dhe janë thyer xhamat e zyrave të Godinës së të Përndjekurve Politikë si dhe të disa dyqaneve përreth.

Grupi i ekspertëve hedh dyshime se shpërthimi, që ka dëmtuar pjesën e përparme të makinës mund të jetë provokuar nga eksplozivi, por nuk perjashtojnë mundësinë e ndonjë defekti te mundshëm në baterinë e makinës.

Makina ishte regjistruar në emër të shoqërisë “GALAXY MOTORS PALACE”, një kompani me përfaqësues ligjor Aldi Kuzmi dhe Artur Çela.