I pakënaqur nga operacioni, rrihet në QSUT mjeku

Dhunuesi eshte djali i pacientit të operuar javën e kaluar. Ai nuk ka mbetur i kënaqur
nga operimi i të atit dhe ne grindje e siper me mjekun roje, e ka rrahur ate me grushte
Version multimedial i ketij lajmi

TIRANE-Nuk ka mbetur i kënaqur nga operimi i të atit dhe pasditen e së mërkurës ka nisur
të shajë dhe godasë çdokënd që ka gjetur me bluzën e bardhë, në korridoret e spitalit
numër 2 të Qendrës Spitalore “Nënë Tereza”, në Tiranë. Ai që e ka pësuar më keq ishte
mjeku i rojës, Ibrahim Bruka, ish-deputet i Partisë Demokratike në legjislaturën 2001-2005,
dhe njëkohësisht anëtar i komisionit të shëndetësisë dhe mbrojtjes së mjedisit në atë
periudhë. Shërbimet e Komisariatit numër 4 të Policisë së Tiranës, kanë ndërhyrë fill
pasi kanë marrë sinjalizimin përkatës, duke arrestuar në kushtet e flagrancës matjanin
22-vjeçar, Agustin Muçeku. Sipas burimeve, kirurgu Bruka nuk ishte as mjeku që kishte
realizuar ndërhyrjen kirurgjikale tek i ati i Muçekut. Gjithsesi, Prokuroria e Tiranës
ka ngritur akuzën e “fyerjes dhe goditjes për shkak të detyrës”, ndaj matjanit.

Ngjarja
Rreth orës 16:00 të pasdites, kirurgu Bruka, i cili ishte edhe mjek roje të mërkurën,
e ka gjetur Muçekun duke shfryrë dhe ulëritur ndaj stafit të infermiereve dhe sanitareve
të pavijonit. Bruka i është afruar Muçekut dhe duke iu prezantuar si mjeku roje, i ka
kërkuar që të mos u ulërinte infermiereve, por për gjithçka që mund të kishte nevojë,
të komunikonte me të.
“Nuk më është përgjigjur fare, por është kthyer nga unë. Më ka qëlluar me grushte dhe
ofenduar, ndërsa vetë nuk e mësova shkakun e kësaj dhune”. Kështu është shprehur para
oficerëve të Komisariatit numër 4 të Policisë së Tiranës, kirurgu Bruka. Ndërsa Muçeku
ka vazhduar të shfryjë për mjekët dhe mungesën e komunikimit nga bluzat e bardha edhe
në qelitë e izolimit të Komisariatit numër 4 të Policisë së Tiranës.

Policia
Nuk kanë pasur asnjë mëdyshje oficerët e Komisariatit numër 4 të Policisë së Tiranës
dhe prokurori i gatshëm, në vendosjen e urdhrit të arrestit për Muçekun.
Sipas policisë, mes tij dhe kirurgut nuk ka pasur asnjë konflikt që mund të justifikonte
veprimet e dhunshme. Babai i Muçekut mësohet se është operuar në Qendrën Spitalore
“Nënë Tereza” nga një “sëmundje e keqe”. Burimet thanë se bëhet fjalë për kancer dhe
mjeku që kishte kryer ndërhyrjen kirurgjikale, kishte folur më pas me familjarët duke
iu komunikuar rezultatet dhe gjendjen jo fort të mirë të pacientit pas operacionit.
Gjatë gjithë kësaj kohe, babai i Muçekut mësohet se ka qëndruar i shtruar në pavijonet
e QSUT-së. Rezultati jo fort i kënaqshëm i operacionit duket se e ka nervozuar të birin
Agustin Bruka. Ditët e fundit kanë qenë mjaft të tensionuara për familjarët, të cilët
prisnin një përmirësim më të shpejtë dhe më të dukshëm për pacientin. Edhe pasditen e
së mërkurës, moskujdesi sa duhet nga personeli mjekësor sipas Brukës, e kishte nervozuar
këtë të fundit duke bërtitur nëpër korridore dhe prishur qetësinë e nevojshme për
pacientët e pavijonit dhe ka sjellë ndërhyrjen e mjekut të rojës, Bruka.

(balkan web)