Central bërthamor afër Shkodrës, Mali i Zi kundër.

• Shqipëria e Kroacia pritet të firmosin në fund të muajit marrëveshjen për ndërtimin e centralit bërthamor afër Shkodrës. Por Podgorica e ka kundërshtuar projektin duke thënë se në Malin e Zi ligji ndalon ndërtimin e objekteve bërthamore.

TIRANE- Kryeministrat e Shqipërisë dhe të Kroacisë, Sali Berisha dhe Ivo Sanader pritet që në fund të këtij muaji të nënshkruajnë një marrëveshje për ndërtimin e përbashkët të centralit bërthamor afër Shkodrës, pranë kufirit të Shqipërisë me Malin e Zi, bëjnë të ditur mediat ballkanase.
Centrali do të kushtojë rreth katër miliardë euro, ndërsa kapaciteti i tij do të jetë rreth 1.500 megavatë. Ndërtimi do t'i besohet "Elektroekonomisë kroate" dhe pjesa më e madhe e energjisë së prodhuar do të shkojë në Kroaci.

Autoritetet në Podgoricë thonë se nuk kanë marrë ftesë për pjesëmarrje në projektin për ndërtimin e centralit bërthamor në brigjet e liqenit të Shkodrës, një pjesë e të cilit ndodhet në territorin e Malit të Zi.
Ministria malazeze e Turizmit dhe Mjedisit Jetësor kujton se në Mal të Zi ka një ligj që e ndalon ndërtimin e objekteve bërthamore, miratuar në vitin 1995.

Mali i Zi shpreson se në atë rast nuk do të thyhen konventat ndërkombëtare, sipas të cilave, vendi, i cili planifikon të ndërtojë objekt, i cili mund të ndikojë në mjedisin jetësor jashtë kufijve të vet, duhet të marrë miratimin nga të gjitha shtetet potencialisht të rrezikuara nga ndërtimi i objektit.

Në informatat e para për ndërtimin e centralit bërthamor, zëvendësministri i mjedisit, Sinisha Stankoviq deklaroi se Mali i Zi nuk ka mekanizma për ndërtimin e një objekti të tillë në afërsi të kufirit të vet.
Ai, ndërkaq, i paralajmëroi autoritetet në Tiranë, se "Shqipëria i rrezikon marrëdhëniet e mira me Malin e Zi", nëse vendos pa miratimin e Podgoricës për ndërtimin e centralit bërthamor.