Vrasje në Durrës, 2 të vdekur 1 i plagosur

• Dy të vdekur dhe një i plagosur është bilanci i një vrasje të ndodhur pasditen e sotme në mbikalimin e Shkozetit në qytetin e Durrësit. Sipas policisë mësohet se kjo vrasje ka ndodhur për konflikte pronësie midis dy familjeve Hasani dhe Karabrahimi.

DURRËS- Një ngjarje e rëndë ka tronditur qytetin e Durrësit në orët e para të pasdites së sotme. Kështu është përgjakur kjo pasdite Pashke ku në një vrasje me armë zjarri kanë mbetur të vdekur dy persona dhe një i plagosur. Vrasja ka ndodhur në mbikalimin e Shkozetit në qytetin e Durrësit. Mësohet se viktimat janë Shaban Karabrahimi 49 vjeç dhe Sadik Laze 27 vjeç. Ndërkohë i plagosuri është Iliradin Karabrahimi, i cili është i vëllai i viktimës, aktualisht ai ndodhet i shtruar në spitalin rajonal të Durrësit dhe është jashtë rrezikut për jetën.

Sipas burimeve paraprake të policisë mësohet se kjo vrasje ka ndodhur për arsye pronësie, ku thuhet se dy vëllezërit kanë debatuar me autorin i cili kreu këtë vrasje të rëndë. Ndërsa viktima Sadik Laze 27 vjeç, mendohet se nuk ka qenë i përfshirë në këtë ngjarje, por ai ka qenë i pranishëm aty pranë dhe plumbat e kanë goditur duke e lënë të vdekur në vend.
Ndërkohë policia e Durrësit ka bërë të mundur identifikimin dhe arrestimin e menjëhershëm të autorit të kësaj ngjarje të rëndë.

Ai është Kujtim Hasani 38 vjeç me origjinë nga Tropoja me banim në Durrës. Arrestimi i tij është bërë i mundur në zonën e Shkozetit jo shumë larg vendit të krimit të kryer prej tij. Si provë materiale atij i është sekuestruar pistoleta tip TT më të cilin 38 vjeçari kreu krimin. Sipas policisë familja Hasani dhe Karabrahimi ka qenë në konflikt pronësie, çka ka çuar edhe në këtë ngjarje të rëndë.