Vrasja e deputetit PS, policia identifikon autorin.

• Specialët e RENEA-s dhe forca të shumta policie kanë zbarkuar në fshatin Roskovec të Fierit,ku dyshohet të jetë fshehur autori i vrasjes së deputetit Fatmir Xhindi. "GSH" shkruan sot se identifikimi është bërë nëpërmjet shenjave të gishtërinjve të gjetura në një pako aspirine në vendin e ngjarjes.

TIRANE-“Gazeta Shqiptare” shkruan sot se policia ka identifikuar autorin e vrasjes së deputetit të Partisë Socialiste, Fatmir Xhindi të shtunën në Roskovec të Fierit. Lajmi bëhet i ditur nga burime zyrtare të Policisë së Shtetit dhe Prokurorisë së Krimeve të Rënda, që po hetojnë për zbardhjen e ngjarjes së rëndë. Emri i të dyshuarit nuk bëhet i ditur për arsye hetimore, por burimet konfirmojnë se arrestimi i tij është çështje orësh.

Operacioni i zhvilluar përgjatë ditës së djeshme ka rezultuar i pasuksesshëm. Deri në orët e vona të mbrëmjes, forcat policore kanë kontrolluar kodrat e Roskovecit, pasi dyshohej se autori i dyshuar fshihej aty, pa mundur ta prangosnin. Burime nga policia bënë të ditur se identifikimi është bërë nëpërmjet shenjave të gishtërinjve të gjetura në një pako aspirine në vendin e ngjarjes. Hetuesit sqarojnë se, duke qenë që shenjat mbi pakon e aspirinës nuk ishin të deputetit të PS-së, janë bërë verifikimet për të parë se kujt i përkisnin dhe ka rezultuar të jetë një prej banorëve të fshatit, emri i të cilit është tashmë një prej të dyshuarve kryesorë.

Hetimet
Një grup hetimor i Prokurorisë së Krimeve të Rënda po bashkëpunon me policinë për zbardhjen e ngjarjes së rëndë. Grupi i hetimit është instaluar në një godinë ngjitur me policinë e Fierit dhe po analizon çdo detaj të ngjarjes së rëndë. Në qytetin e Fierit për të ndjekur nga afër hetimet ndodhet dhe kreu i Policisë së Shtetit, Ahmet Prençi ndërsa dje pasdite në Drejtorinë e Policisë së Fierit ka mbërritur dhe ministri i Brendshëm, Bujar Nishani.

Policia e Juglindjes ka kaluar në gjendje gatishmërie, në vëmendjen e bluve janë pikat e kalimit kufitar, Kapshtica dhe Qafë-Thana, ndërsa punohet me shërbime 24-orëshe në të gjitha rrugët nacionale.