Vazhdon telenovela Ibra-Eto.

Kalimi i Ibrahimovic te Barcelona ka mbetur pezull për shkak të kërkesave të Samuel Eto, por spanjollët e kanë rritur ofertën deri në 75 milionë euro. Ndërkohë, në Amerikë Interi ka pësuar një tjetër humbje, duke u mundur 2-0 nga Celsi i Ancelotit.

MILANO- Në Milano është duke u zhvilluar raundi i fundit i bisedimeve për kalimin e Zllatan Ibrahimoviç te Barcelona dhe të Samuel Eto tek Interi. Agjenti i kamerunasit Hoze Maria Mesales nuk ka gjetur dot një akord me Barcelonën për të marrë një shpërblim prej saj, ndërkohë që është paraqitur rreth orës 17 në selinë e Interit për të negociuar sërish me zëvendës presidentin Rinaldo Gelfi.

Pavarësisht rezistencës së Eto, Barcelona këmbëngul për Ibrahimoviç dhe e ka rritur ofertën nga 45 në 75 milionë euro neto, plus huazimin e Hleb. E ndërkohë, në Shtetet e Bashkuara të Amerikës Interi ka humbur 2-0 në miqësoren ndaj Çelsit të Karlo Ançelotit, ndërkohë që ra në sy edhe një frakturë e Zllatan Ibrahimoviç në dorë. Drogba shënoi golin e parë pas një gjuajtje nga larg, që portieri Belec nuk arriti ta kontrollonte.

Në pjesën e dytë Frenk Lampard realizon golin e dytë me penallti, pas një prekje me dorë të Kordobës, duke treguar se Interi ka ende për të bërë. Duket se kjo do të jetë ndeshja e fundit e Zllatan Ibrahimoviç me zikaltërit dhe në fund, suedezi u mundua të shënonte të paktën një gol nderi përpara Hoze Murinjos, që u duk jo pak i inatosur me sjelljen e skuadrës së tij në fushën e lojës.