Schwarzenegger: Terminator 4 ishte i shpifur

Aktori i njohur, Arnold Schwarzenegger, është shprehur i lehtësuar që nuk ishte pjesë e filmit “Terminator Salvation”.

Ai duket se nuk i ka rënë pishman që kishte refuzuar filmin e vitit 2009, të cilin e quajti “të shpifur”.

Schwarzenneger ishte ylli kryesor në tre filmat e parë të serisë së njohur, dhe do të rikthehet në rolin e famshëm në filmin “Terminator Genisys” më vonë gjatë vitit.

Në një intervistë për “Good Morning America” kur u përmend mungesa e tij në filmin e katërt në vitin 2009, ai u përgjigj: “Falënderoj Zotin, ishte i shpifur”.

Ai refuzoi të vlerësonte se cili nga tre filmat e parë të tij ishte më i mirë.

“Nuk mund ta them këtë. Mendoj se të tre filmat në të cilat isha, kishin personalitetet e tyre dhe storiet interesante”, tha ai.

Në filmin e fundit krahas Schwarzeneggerit luajnë edhe Emilia Clarke, Jai Courtney Jason Clarke dhe JK Simmons.