20 PERQIND E TE RINJVE NE KRYEQYTETIT TE DEHUR

TIRANE- Përdorimi pa kriter i duhanit dhe alkoolit janë shkaktarët kryesorë që nxisin dëmtimin e shëndetit të të rinjve të moshës 15-19 vjeç. Sipas një studimi të kryer nga Instituti i Shëndetit Publik, ku u përzgjodhën për anketim 4000 nxënës të shkollave të mesme publike, u konstatua se përdorimi i alkoolit dhe duhanit mbetet një problem shqetësues për adoleshentët. Studimi i ISHP-së tregon se fenomeni i pirjes së duhanit dhe konsumit të alkoolit ka pësuar rritje, sidomos në moshat e reja. Sipas anketave të këtij studimi, 54 për qind e të rinjve kanë deklaruar se kanë provuar të pinë duhan. Gjithashtu, sipas këtij studimi të kryer nga ISHP-ja, në Tiranë 20 për qind e konsumatorëve mbi 15 vjeç e përdorin alkoolin mbi normën e lejuar. Ndërsa 2 për qind konsiderohen persona me vartësi të mundshme ndaj alkoolit.
Studimi
Instituti i Shëndetit Publik ka kryer një studim rreth konsumimit të alkoolit dhe pirjes së duhanit nga të rinjtë, në vendin tonë. Pjesë e këtij studimi kanë qenë nxënës të gjimnazeve publike, ku janë përzgjedhur për anketim 4000 nxënës të moshave 15-19 vjeç. Sipas këtij studimi, fenomeni i pirjes së duhanit dhe i alkoolit, sidomos nga moshat e reja ka ardhur në rritje. Anketimet e këtij studimit tregojnë se 54 për qind e të rinjve raportuan se kishin provuar të pinin duhan dhe 52 për qind e tyre kishin konsumuar pije alkoolike. Ndërkohë, mendohet se 81 për qind e duhanpirësve e fillojnë konsumimin para moshës 18-vjeçare, ndërsa 20 për qind e të rinjve të anketuar tregojnë se e kanë filluar konsumimin e alkoolit mbi moshën 15 vjeç. Gjithashtu, sipas ISHP-së në Tiranë 20 për qind e konsumatorëve mbi 15 vjeç e përdorin alkoolin mbi normën e lejuar. E thënë ndryshe, 1 në çdo 5 qytetarë në kryeqytet përdorin alkool mbi normat e lejuara. 2 për qind konsiderohen persona me varësi të mundshme nga alkooli, ndërsa pjesa tjetër, 78 për qind e tyre pinë pak ose nuk pinë fare.
Pasojat
Konsumimi i alkoolit dhe i duhanit janë shkaktarë për disa sëmundje të ndryshme. Vetëm pirja e duhanit shkakton 25 lloje sëmundjesh, ku më e rrezikshmja është kanceri i mushkërive. Ndërkohë që konsumimi i pijeve alkoolit mendohet se është përgjegjëse për rreth 9 për qind të të gjithë peshës së sëmundjeve. Duke rritur ndër të tjera rrezikun për cirrozë hepatike, tension të lartë të gjakut, sëmundje të zemrës, hemorragji cerebrale, dhe kancer të gojës, stomakut e mëlçisë. Gjithashtu, alkooli është dhe shkaktari kryesor për aksidentet rrugore, pasi sipas disa të dhënave nga Ministria e Rendit Publik, 85 për qind e aksidenteve rrugore shkaktohen nga përdorimi i alkoolit në timon. Ndërkohë që 16 për qind e drejtuesve të automjeteve përdorin rregullisht pije alkoolike, ndërsa 19 për qind e tyre e konsumojnë me raste.

(s.g/GazetaShqiptare/Balkanweb)