Dita e Fundit ne Kuvend, Opozita braktis sallën.

• Opozita ka braktisur punimet e Kuvendit pas replikave të ashpra në sallë me kryetaren e Kuvendit, Jozefina Topalli. Deputetët e opozitës kërkuan diskutime për problemet me kartat e identitetit. Kryetaret e dy grupeve më të mëdha parlamentare, Leskaj dhe Patozi kanë shkëmbyer replika edhe për skandalin më të fundit publikuar sot në Gazetën Shqiptare dhe News 24 lidhur me zbardhjen e tabulateve telefonike mes djalit të Berishes dhe dy prej te pandehurve kryesore të Gërdecit, Mediun dhe Delijorgjin vetëm pak minuta pas tragjedisë së rëndë. Brace për News24: "Kryeministri, familja e tij dhe ministrat kishin dijeni për Gerdecin".

TIRANE-Berisha për largimin e PS nga salla: Ikja akt i papërgjegjshëm
Ora: 20:20- Lidhur me largimin e grupit parlamentar të PS-së nga salla e Kuvendit ka folur kryeministri Berisha, i cili e ka cilësuar këtë largim si papërgjegjshmëri të opozitës dhe shprehje të qëndrimit të saj kundër miratimit të ligjit për Gjykatën Administrative.
Kryeministri Berisha e ka cilësuar projektligjin si shumë të domosdoshëm për biznesin shqiptar dhe si të shumëpritur nga biznesi.
“Biznesi shqiptarë ka dëshmuar interes të jashtëzakonshëm pasi është kjo gjykatë që më shumë së çdo tjetër mbron biznesin nga arbitraritete të agjentëve ëe ekzekutivit, është kjo gjykatë e cila i jep fund një diskutimi të bërë në këtë parlament lidhur me disa penalitete të parashikuara për bizneset në raste të caktuara, është kjo gjykatë që do të konsolidojë konkurrencën e ndershme, është kjo gjykatë e cila po pritej me padurim nga të gjithë biznesmenët dhe shoqata e biznesit”- tha Berisha. ,
Kryeministri sulmoi opozitën duke thënë se nuk e do një gjykatë të tillë dhe se largimi i saj nga kjo sallë do të mbahet mend si një akt papërgjeshmërie. “Një akt shumë i rëndë fakti që opozita e braktisi parlamentin në ditën ku do të votohej për Gjykatën Administrative, unë kam besim se biznesi shqiptarë do di të flasë denjësisht ndaj këtij akti të papërgjshëm”- përfundoi Berisha.

Kuvend, miratohet pa praninë e opozitës, kredia për Durrës-Kukës
Ora 20:00-Kuvendi ka miratuar pa praninë e opozitës kredinë për rrugën Durrës- Kukës. Kredia u miratua me 73 vota pro dhe do të merret nga qeveria në dy banka me interes 11.3%. Deputeti socialist, Erjon Brace tha për televizionin “News24” se kredia është aprovuar pa asnjë garë dhe nuk ka të dokumentuar asnjë procedurë.
“Kredia që po marrin nuk ka të dokumentuar asnjë procedurë, për tre vitet e ardhshme qeveria që do të vijë në pushtet do të duhet të paguajë 46.5 milion euro vetëm interesa, që janë të barabarta me pagesën e 8 muajve rresht të100 mijë pensionve në fshat” theksoi Brace.

Brace: Qeveria ishte në dijeni për Gërdecin
Ora: 19:42- Nënkryetari i grupit parlamentar të PS, Erjon Brace sqaron për televizionin “News24” arsyet e braktisjes së kuvendit nga ana e opozitës duke theksuar se nuk mund të pranohej dhuna e ushtruar nga kryetarja e Kuvendit. “Kemi 4 vjet që në këtë sallë, na është dhunuar e drejta e fjalës, nuk mund ta pranonim këtë edhe në ditën e fundit të seancës” u shpreh Brace.
Deputeti socialist ka folur edhe për skandalin e publikuar sot në “Gazetën Shqiptare” dhe “News24” për tabulatet që vërtetojnë se vetëm pak minuta pas shpërthimit në Gërdec, Mihal Delijorgji dhe djalit i kryeminitrit kanë biseduar në telefon. Brace tha se qeveria ka gënjyer për Gërdecin, madje theksoi se kryeministri , familja e tij dhe ministrat kishin dijeni për këtë cështje.
“Na patën thënë se nuk kishin dijeni për fabriken e vdekjes dhe shpërthimi u kishte rënë si rrufe në qiell të hapur. Jo vetëm që kanë qënë në dijeni por kanë pasur edhe miqësi” u shpreh Brace për “News24”, duke i bërë apel qeverisë të përgjigjet për vrasjen e 26 viktimave të Gërdecit.
Ndër të tjera, Brace theksoi në emër të Partisë Socialiste se fokusi i tyre do të jetë garantimi i të drejtës së votës për të gjithë qytetarët që kanë mbushur moshën 18 vjec.
Ndërkaq, Brace ka renditur një sërë skandalesh të qeverisë, duke thënë se parlamenti do të mbyllet me gjurmë aferash korruptive.
Duke folur për kredinë e rrugës Durrës-Kukës, deputeti socialist tha se maxhoranca po krijon borxhe të mëdha mbi kurriz të shqiptarëve.

Hetimet për Xhindin, Nishani: Ngjarja do të zbardhet shpejt
Ora 19:05 Lidhur me akuzat e ngritura ndaj qeverisë për zbardhjen e vrasjes së deputetit të Partisë Socialiste Fatmir Xhindi, reagoi ministri i Brendshëm Bujar Nishani i cili siguroi se hetimet po vazhdojnë intensivisht dhe se shumë shpejt do arrihet zbardhja e këtij krimi barbar. “Hetimet po vazhdojnë me intensitet të lartë, policia e shtetit po punon intensivisht me institucionet e tjera të drejtësisë që nga dita e këtij krimi. Hetimet kanë përparuar ne mënyrë esenciale, në interes të ligjit dhe drejtësisë. Është një ngjarje që do të zbardhet shumë shpejt”- u shpreh ministri Nishani.

Opozita braktis sallen e Kuvendit
Ora:18:59- Pas refuzimit të fjalës nga kryetarja e kuvendit, opozita ka braktisur sallën e kuvendit. Në replikë me kryetaren e grupit parlamentar të PS, kryeparlamentarja u është drejtuar deputetëve të opozitës, duke thënë se janë keqpërdorur nga kryetari i tyre. Leskaj ka akuzuar Topallin se e ka shndërruar parlamentin në një mbledhje të Partisë Demokratike.

Patozi: Tabulatet, përralla pa efekt
Ora: 18:50-Kryetari i grupit parlamentar të Partisë Demokratike, Astrid Patozi ka akuzuar deputetët e opozitës se po bëjnë përpjekje për të njollosur vendin.
“Po bëhet një përpjekje e qëllimshme për të njollosur integritetin e këtij parlamenti. Për ju Shqipëria është vendi juaj vetëm kur jeni në pushtet, sepse e keni lidhur gjithçka me karrigen tuaj” tha Patozi.
Patozi ka konsideruar publikimin e tabulateve telefonike mes Delijorgjit, Mediut e Djalit të kryeministrit si përralla pa efekt. Ndërkohë, Patozi kundërshtoi Leskaj duke thënë se rendi i marrjes së fjalës është bërë sipas Konferencës së kryetarëve.

Leskaj: Presim përgjigje për vrasjen e deputetit Xhindi
Ora: 18:45- Gjatë fjalës së saj në seancën e fundit të kuvendit, kryetaria e grupit parlamentar të PS, Valentina Leskaj theksoi se shqiptarët presin një përgjigje për vrasjen misterioze të deputetit, Fatmir Xhindi.
“U bë më shumë se një javë nga vrasja e Xhindit. Ngjarja është shumë e rëndë, u vra një politikan i opozitës në prag zgjedhjes, ky akt kriminal nuk mund të mbetet në heshtje. Ne, familja, zgjedhësit presim një përgjigje serioze, që deri më sot nuk e kemi marrë” u shpreh Leskaj.
Leskaj ka folur edhe për procesin e kartave të identitetit , duke nënvizuar se ecuria e procesit nuk jep garanci se të gjithë shqiptarët do të kenë mundësi të votojnë.
“Ecuria e deritanishme e procesit nuk jep asnjë garanci se të gjithë shqiptarët do të kenë mundësi të ushtrojnë të drejtën kushtetuese se do të votohet” tha Leskaj.

Engel: Siguroni të drejtën e votës për cdo shqiptar
Ora:18:30- I pranishëm në seancën e sotme të parlamentit, kongresmeni amerikan Eliot Engel ka mbajtur një fjalim në të cilin ka theksuar se Shqipëria ka bërë përparime por mbetet ende punë për të bërë. Duke folur për zgjedhjet e ardhshme të qershorit, Engel u shpreh se është shumë e rëndësishme të sigurohet e drejta e votës për cdo qytetar.
“Mbetet e rëndësishme që cdo qytetar të shkojë në votim. Inkurajoni votuesit dhe siguroni që cdokush që marrë kartën e identitetit. Kjo është një përgjegjësi e madhe, për ti treguar Europës dhe SHBa se Shqipëria po shkon drejt Europës” tha Engel përpara deputetëve të Kuvendit.
Ndër të tjera Engel ka përgëzuar për anëtarësimin e Shqipërisë në NATO, duke thënë se hapi tjetër mbetet antarësimi në BE.

Kuvend, nis seanca e fundit
Ora:18:09- Ka nisur seanca e radhës e parlamentit shqiptar, ku pritet të ketë debate, pasi axhenda e caktuar është tejet e ngarkuar me projektligje të rëndësishme. 140 ligjvënësit janë mbledhur në ditën e fundit të punës, për të nisur më pas fushatën elektorale, ku një pjesë e mirë e tyre janë sërish kandidatë për deputetë.
Seanca parlamentare parashikon një rend dite me rreth 15 pika, ku do të shqyrtohen një numër projektligjesh, si ai "Për gjykatat administrative", "Per tregtinë elektronike" dhe "Për gjendjen civile".
Deputetët kanë lënë për në mbledhjen e tyre të fundit miratimin e draftit të fundit të reformës në drejtësi, Gjykatës Administrative, projektligj i cili për 7 muaj radhazi mbeti në sirtarët e Kuvendit në mungesë të një konsensusi. Për miratimin e këtij projektligji kanë bërë thirrje të gjithë faktorët e rëndësishëm ndërkombëtarë, përfshi këtu ambasadën amerikane si dhe praninë e OSBE-së në Shqipëri.

(balkanweb)