Aurela Gace:Tani jam në kontakt me seksin,po mendoj martesen

Ç'do të thotë të jesh një femër seksi? Një femër e adhuruar... Një femër që do dhe të duan... Në një kohë kur
shoqëria shqiptare ende nuk është e çliruar plotësisht për t'u shprehur për këto çështje, Aurela Gaçe ka vendosur t'i thyejë të gjitha këto tabu. Për herë të parë, këngëtarja e famshme shqiptare vjen në një intervistë,pa doreza, duke ndarë edhe ndjesitë më të brishta me ne. Le të ecim së bashku në këtë udhëtim ndërpersonal me Aurelën, ku këtë herë, rruga është vetëm me semaforë jeshilë...

Cila është gjendja shpirtërore aktuale e Aurelës?
Perfeksion. Me pak boshllëqe aty-këtu. Ndihem shumë mirë, por herë-herë ka edhe momente jo shumë të admirueshme.
Kur e keni dhënë puthjen e parë?
Besoj të gjithëve ju kujtohet ajo kënga "As e vogël, as e madhe..." Megjithatë, mund të them se me ritmet e kohës sot, puthjen e parë e kam dhënë pak e madhe.

Si e kujton? A ishte romantike siç e prisnit?
Skandal.

Kur keni rënë për herë të parë në dashuri?
Kam qenë 23 vjeç dhe kam frikë se aty më ka ngelur ora.

Besoni në dashurinë me shikim të parë?
Besoj, sepse ashtu më ka ndodhur.

Me cilën nga shprehjet jeni dakord: "Njeriu dashuron vetëm një herë në jetë" apo "Dashuron sa herë i jepet mundësia"?
Jam munduar të dashuroj sa herë më jepet mundësia, por aq e fortë dhe e bukur ndodh vetëm një herë në jetë (qesh).

Aurela ka dashur më shumë, apo e kanë dashur?
Besoj se më kanë dashur më shumë. Fakti që unë e kam pasur arsyen e fortë për t'u larguar, do të thotë se më kanë dashur më shumë.

Kur jeni ndjerë për herë të parë seksi?
Që kur fillova të shikoj se bëhesha objekt bisede, në adoleshencë... pastaj se ku më humbi diku rrugës së rritjes sime si njeri e si femër (a ma vodhën, a më humbi këtë s'e di, haha)... Tani jam prapë në kontakt me të dhe ju betohem që s'ka shans të më humbasë prapë (qesh).

Çfarë ju bën të ndiheni seksi, thjesht një veshje provokuese, apo...?
Gjendja shpirtërore. Kur jam mirë, e di se çfarë energjie lëshoj.

Cila është arma juaj e joshjes?
Kam shumë. Për secilën prej tyre duhen pyetur ata që joshen nga unë.

Çfarë femre do ta përshkruanit veten?
Pasionante, ndonjëherë deri në çmenduri...

Është Aurela një femër e realizuar?
Kam akoma shumë për të realizuar. Por, deri këtu ku kam arritur, jam e realizuar.

Kush është femër seksi për ju?
Të gjithë sot pëlqejnë Beyonce, Jennifer Lopez, Shakira e Kylie Minogue. Të gjithë mendojnë se ato janë shumë seksi... Dhe, ato janë vërtetë... por a e di pse? Sepse ato e pëlqejnë shumë veten e tyre. Janë konfidente me perfeksioniet dhe imperfeksionet që kanë. Jennifer Lopez është femër që i është thënë nga menaxheri i vet të humbi peshë, sepse moda ishte masa 0 dhe jo 6, dhe ajo e pushoi nga puna. Ajo i tha botës, ju do të më doni për këtë që jam, dhe sot gjithë vajzat ëndërrojnë të kenë çfarë ajo ka. Jam e bindur që Kylie Minogue do të quhej shkurtabiqe këtu tek ne (1.52 cm) dhe Beyonce do të quhej me këmbë të trasha dhe jam e bindur, regjisorët tanë do t'u thoshin, mbulohu, mbulohu se dukesh keq. Përfundimi ato e duan veten, prandaj i duam dhe i adhurojmë ne. Femër seksi është më shumë se të kesh pamje "alla bordello", gjë që e shoh pothuajse në çdo televizion ose edhe në rrugë këtu tek ne. E, kjo është e vërteta e hidhur, ajo që shoh.

Çfarë ju bën të qani, të qeshni, të hidheni përpjetë nga gëzimi?
Qaj, kur më lëndojnë. Ndonjëherë qaj edhe me lajmet...
Qesh nga shumë gjëra. Hidhem përpjetë nga të tjera. Për shembull, kur kam dëgjuar një këngë që më ka pëlqyer shumë, pasi e kam realizuar, jam hedhur përpjetë. Apo, edhe kur motra ime fitoi shkollën më të mirë të teatrit në Manhatan, jam hedhur gjithë ditën përpjetë nga gëzimi.

Gjithmonë jepni idenë e një femre të fortë. Kështu jeni përherë? Si reagoni ndaj situatave të ndryshme?
Ndonjëherë, guximi i njerëzve mediokër më huton dhe e humbas toruan, bëhem e mefshtë dhe ajo femra e fortë bëhet zero, gjë që nuk më pëlqen fare. Megjithatë, e marr veten shpejt dhe mundohem të ngrihem menjëherë në këmbë.

Përse ndihet krenare me veten e saj, Aurela?
Pak të duket?!

A ka një pikë ku ndiheni e sfiduar?
Kur shoh koleget e mia që kanë nga katër makina dhe katër apartamente, aty ndihem vërtetë e sfiduar.

Cili është obsesioni juaj sekret?
Shumë njerëz më shohin si serioze, por do të doja të interpretoja një rol në komedi. Dhe, jam e sigurt që do t'i kënaq njerëzit.

Cili është vendi ideal për ju për të bërë dashuri?
Kujdes, se ka fëmijë këtu rrotull.

Po vendi më i çuditshëm, apo më i papërshtatshëm?
Fëmijët vazhdojnë të jenë rreth e rrotull.

Cili është mashkulli juaj ideal?
Një mashkull që peshon rëndë në tokë. Një mashkull, që për të, nuk ka asnjë gjë të pamundur.

Çfarë do të ishte e gatshme të sakrifikonte për dashurinë, Aurela?
Edhe kur kam qenë e verbuar nga dashuria, nuk e kam sakrifikuar këngën.

E kërkoni dashurinë, apo prisni që ajo t'ju gjejë?
Më ka gjetur.

Cila është femra që ju adhuroni?
Nëna ime.

Cila është dhurata më e bukur që keni marrë nga një mashkull?
E di vetë ai.

Ç'mendim keni për lidhjet homoseksuale?
Kam shumë shokë homoseksualë, si në Amerikë, ashtu edhe në Shqipëri, dhe nuk më sjellin as më të voglin problem. Për mua, janë shokët më të mirë.

E mendon martesën afër apo larg?
Deri tani, kisha kohë që e kisha fshirë nga mendja, por ndoshta do filloj të mendoj ndryshe.

Cili është vendi juaj i preferuar për 'muaj mjalti'?
Meqë martesën e kisha fshirë nga mendja, edhe tek 'muaji i mjaltit' nuk më kishte shkuar mendja.

E çon ndonjëherë në mendje idenë për të pasur një fëmijë, edhe pa qenë e martuar, apo fëmija tek ju do të vijë vetëm si fryt i një martese?
Në momentin kur martesa nuk ishte në planet e mia, mendoja se fëmija do
të ishte fryt i një lidhjeje dashurie.

Çfarë do të donte të realizonte këtë vit Aurela?
Kam kaq shumë gjëra, sa ky vit nuk i ngre dot të m'i sjellë. Meqë njihem si fëmijë ambicioz, mendoj se dëshirat e mia nuk mund të plotësohen brenda një viti.

A mund t'ju pyes nëse jeni e dashuruar?
E vlerësoj etikën tuaj, por le të ngelet jeta ime private e pazbuluar.

Në fund të kësaj interviste, si ndihet Aurela?
Gjysmë e dehur. Në anglisht është një fjalë "tipsy", që pak a shumë do të thotë "e çliruar". Më vjen keq që shoqëria jonë nuk është kaq e emancipuar që unë të ndihem tërësisht e dehur.