Grabitësit masakrojnë rojen e dyqanit.

Durres Një dyqan bizhuterish në Fushë- Krujë është tentuar të grabitet, ndërsa ka mbetur i plagosur rëndë roja i objektit, i cili nuk ka lejuar prekjen e sendeve prej floriri. Rezistenca ndaj autorëve të krimit për pak sa nuk i ka kushtuar jetën 49-vjeçarit Gëzim Koçiut. Ngjarja e rëndë u shënua në orët e para të mëngjesit të djeshëm.

GRABITJA
Burime zyrtare nga Drejtoria e Policisë së Qarkut të Durrësit bëjnë me dije se, rreth orës 02:45, persona ende të paidentifikuar janë futur në dyqanin me emrin "Bizhuteri", në pronësi të F.M., banues në qytetin e Fushë-Krujës. Mësohet se autorët e krimit kanë hyrë nga dera e pasme e dyqanit, por janë diktuar nga roja, Koçiu. Ky i fundit është përleshur me grabitësit dhe nuk i ka lejuar ata që të marrin sendet prej floriri. Të gjendur para një situate të tillë, grabitësit kanë goditur me mjete të forta në kokë dhe në trup 49-vjeçarin. Për pasojë, ky i fundit ka rënë pa ndjenja në tokë. Të trembur nga zhurma e madhe e shkaktuar nga përleshja me rojen e dyqanit, hajdutët janë detyruar të heqin dorë nga plani i tyre. Ata janë larguar me shpejtësi të madhe, ndërsa kanë lënë të shtrirë mes një pellgu gjaku, rojen e dyqanit të bizhuterive. Viktima është dërguar urgjentisht në Spitalin Ushtarak të Tiranës. Mjekë të këtij spitali pohojnë se 49-vjeçari mbërriti me plagë të shumta në kokë dhe në trup. Vetëm pas dhënies së ndihmës së parë mjekësore është përmirësuar gjendja shëndetësore e Gëzim Koçiut. Sipas bluzave të bardha, i plagosuri ndodhet jashtë rrezikut për jetën.

HETIMI
Forca të shumta policore kanë mbërritur në vendngjarje dhe kanë nisur kryerjen e veprimeve të para hetimore. Nga hetimet e deritanishme, ende nuk është përcaktuar numri i grabitësve dhe nuk është bërë i mundur identifikimi i tyre. Ndërkohë, nga këqyrja e vendit të ngjarjes (dyqanit, banakut dhe vitrinave), nuk është gjetur asnjë shenjë thyerje dhe vjedhjeje. Disa kohë më parë, po në qytetin e Fushë-Krujës, një tjetër dyqan, i cili kishte si aktivitet biznesin e celularëve, u dëmtua me eksploziv nuk dihet se për çfarë shkaqesh. Gjatë katër muajve të parë të këtij viti është shtuar numri i vjedhjeve dhe grabitjeve të dyqaneve dhe lokaleve në Qarkun e Durrësit.