Ersekë, shembet depo, zë poshtë 5 të rinj, 2 humbin jetën.

• Ngjarja ka ndodhur rreth orës 18: 30 në një ish depo misri në Ersekë, ku si pasojë e shembjes së tarracës kanë mbetur poshtë rrënojave 5 të rinj. Policia bën të ditur se si pasojë e plagëve dy djem kanë humbur jetën, ndërsa tre të tjerët kanë mundur të mbijetojnë. Të rinjtë janë të moshës nga 7 deri në 20 vjec. Të plagosurit janë dërguar në spitalin rajonal të Ersekës dhe janë jashtë rrezikut për jetën.

ERSEKE- Dalipi: Ngjarja, përpjekje e familjes Shkoza për të mbijetuar

Ora: 22:02- Deputeti socialist Alfred Dalipi ka bërë të ditur për News24 se familja Shkoza në cdo sekondë të ditës bënte përpjekje për të mbijetuar.
“Familja Shkoza është mbajtur gjithmonë me mjete rrethanore, nëpërmjet mbledhjes së bimëve medicinale apo mbledhjes së hekurave” theksoi Dalipi.

Deputeti socialist shprehet se në Ersekë, ka shumë familje të varfra për shkak të mungesës së plotë të politikave për punësim.
“Ne rrethin e Ersekës mungojë politikat e punësimit. Njerzit jetojnë në mëshirë të fatit. Papunësia është në shifrat më të larta në të gjithë Shqipërinë” tha Dalipi për News24.

Brace: Familja Shkoza me probleme ekonomike, fëmijët mblidhnin hekura

Ora: 21:50- I kontaktuar në telefon nga televizioni News24, kreu i bashkisë së Ersekës, Adriatik Brace konfirmon se të rinjtë kanë lidhje gjaku dhe i përkasin një familje egjiptiane në Ersekë. 5 të rinjtë, mes tyre dhe një vajzë kanë qënë brenda godinës kur janë zënë nën rrënoja pas rënies së tarracës.
Brace bën të ditur se familja Shkoza njihej si familje me probleme të mëdha ekonomike, dhe për këtë shkak fëmijët janë detyruar të mbledhin hekura. Për këtë ngjarje është ngritur një grup i posacëm hetimor.

Ersekë, shembet depo, zë poshtë 5 të rinj, 2 humbin jetën

Ora: 21:26- Pesë të rinj kanë mbetur poshtë rrënojave pas shembjes së tarracës së një depoje në Ersekë. Mësohet se të rinjtë janë të moshës nga 7 deri në 20 vjec, të cilët ishin duke mbledhur mbeturina hekuri në ndërtesë. Ngjarja ka ndodhur rreth orës 18: 30 në një ish depo misri në magazinat e ish Ndërmarrjes së Grumbullimit, në afërsi të fshatit Psar,. Policia bën të ditur se si pasojë e plagëve dy djem, konkretisht Fatjon Shkoza dhe Sh.Shkoza kanë humbur jetën, ndërsa tre të tjerët janë nxjerrë nga rrënojat me plagë të rënda në trup.
Të plagosurit janë dërguar në spitalin rajonal të Ersekes dhe janë jashtë rrezikut për jetën.

Të rinjtë kanë qënë brenda në ndërtesë për të nxjerrë hekur, të cilin me pas e përdornin për ta shitur si skrap. Nga punimet e kryera në ndërtesë, është dëmtuar konstrukti mbajtës i godinës dhe për pasojë ka rënë catia e saj duke i zënë të pestë brenda.