Hiqet ndihma ekonomike, shtohet buka me listë

Familjet që jetojnë prej vitesh me ndihmë ekonomike, thonë se janë detyruar t'i shtrohen marrjes së bukës dhe ushqimeve me listë. "Në shtëpinë tonë nuk punon asnjëri dhe na kanë hequr ndihmën ekonomike",- thotë Drita Musai, nga Kamza. Familja e saj jetonte me lekët që i jepte shteti. Në pragun e derës së saj duket që ka zënë rrënjë "mjerimi". Janë plot familje të tjera tejet të varfra në Shqipëri, që sipas Dritës jetojnë histori të dhimbshme si të sajat dhe janë përjashtuar nga ndihma ekonomike, ndoshta ndër më të dhimbshmet e tranzicionit kaotik shqiptar. Në këto lagje të harruara të kryeqytetit, marrja e ushqimeve me listë është dëshmi e qartë e varfërisë ekstreme që ka pllakosur në dhjetëra familje. Megjithëse, qeveria "Berisha" pati shpallur kohë më parë skemën e kafshatës, mijëra persona nuk munden të sigurojnë bukën e gojës, duke shtuar në këtë mënyrë listën e gjatë me borxhe në dyqanet ushqimore. Fenomeni është më i përqendruar në zonat informale të kryeqytetit. Papunësia e madhe është një nga faktorët kryesorë, që i detyron dhjetëra familje t'i drejtohen dyqaneve ushqimore dhe të kërkojnë ushqime me listë. Siç shprehen vetë shitësit, çdo ditë, një numër i madh familjarësh u drejtohet atyre për të tërhequr ushqimet më të domosdoshme dhe në mungesë të parave, nënshkruajnë në fletoret që tashmë janë mbushur plot me emra.