Tmerr në Durrës, burri ther gruan në mes të rrugës

Gëzim Mexhda ka shkuar në vendin e punës së gruas dhe pasi e ka kapur për flokësh,i ka prerë fytin

DURRËS- Tmerr në Durrës, bashkëshorti ther gruan në mes të qytetit dhe largohet pa u arrestuar nga policia. Ngjarja makabre ka ndodhur mëngjesin e djeshëm rreth orës 07.30 minuta në lagjen 17 të qytetit të Durrësit. Gëzim Mexhda ka shkuar në vendin e punës së bashkëshortes, një rrobaqepësi dhe i ka kërkuar asaj të dalë jashtë. Sapo gruaja i është afruar ai e ka kapur për flokësh dhe i ka prerë fytin duke e lënë përdhe në një pellg gjaku. Zana Mezhda nuk ka mundur që të mbijetojë dhe ka gjetur vdekjen disa minuta më pas si pasojë e humbjes së madhe të gjakut. Çifti kishte disa vite i martuar dhe vrasja e djeshme ka lënë jetimë katër fëmijët e tyre. Nga të dhënat e para të policisë dyshohet se shkaku i kësaj vrasjeje të tmerrshme është xhelozia bashkëshortore.

Banorët e lagjes numër 17 të qytetit të Durrësit janë zgjuar të tmerruar mëngjesin e djeshëm nga një skenë makabre. Një grua e shtrirë përdhe në një pellg gjaku dhe pranë saj një burrë mbi 50 vjeç me një thikë në dorë. Dëshmitarët okularë pohuan dje për "Shekullin" se rreth orës 07.00 Gëzim Mezhda ka shkuar në vendin e punës së bashkëshortes së tij Zanës. Kjo e fundit punonte prej shumë vitesh në një rrobaqepësi në territorin e ish -Uzinës së Radio Televizorëve në Durrës. "Gëzimi ka hyrë me një pamje të trishtuar tek dera e rrobaqepësisë dhe ka kërkuar gruan e tij. Sapo e ka parë, Zana, ka dalë me shpejtësi jashtë për ta takuar. Madje ajo harroi edhe shapkat në vendin e punës dhe doli në oborr zbathur",- thanë dje koleget e saj të punës. Sapo ka dalë në oborrin e rrobaqepësisë, 57- vjeçari Gëzim Mezhda ka nisur të bëjë fjalë me bashkëshorten dhe në një moment e ka kapur atë nga mesi duke e tërhequr zvarrë. Gruaja ka tentuar që të bëjë rezistencë por ai e ka kapur për flokësh dhe në moment ka nxjerrë nga brezi një thikë të madhe kuzhine.

"Ai ia ka vendosur gruas thikën në fyt dhe pastaj e ka therur. Ishte një skenë makabre pasi asaj nisi t'i dalë shumë gjak. Me një qetësi të madhe burri i saj e ka lëshuar në tokë dhe është larguar në këmbë nga vendi i krimit me thikën e gjakosur në dorë",- thanë dëshmitarët okularë të ngjarjes. Ata kanë shkuar me nxitim tek gruaja dhe janë përpjekur që ta ndihmojnë. Pasi e kanëhipur në një makinë ata janë nisur për në spitalin e qytetit por gjatë të gjithë kohës nga fyti i gruas dilte vetëm gjak. Burimet e spitalit rajonal pohuan dje se gruaja ka mbërritur e vdekur në urgjencë. Thika i ka prerë gruas arterien kryesore të gjakut dhe gjakderdhja ka qenë tepër e madhe. Ajo ka humbur sasi të mëdha gjaku duke vdekur më pas gjatë rrugës për në spital. Policia lokale është vënë në ndjekje të bashkëshortit vrasës por deri në orët e vona të pasdites ai nuk është arrestuar ende. Të dy ishin banorë të lagjes numër gjashtë të qytetit të Durrësit dhe kishin katër fëmijë.