Kërcënon vajzat me thikë në dorë, arrestohet babai

Policia e Fierit ka arrestuar 50- vjeçarin Xhemal Buzi, pas denoncimit të bërë nga dy vajzat e tij se do t'i vriste
FIER- Babai ka kërcënuar dy vajzat e tij me një thikë në dorë se do t'i vriste por kjo i ka kushtuar arrestimin. Si rrallë herë në rastet e dhunës dhe kërcënimeve brenda familjeve shqiptare, dy vajzat janë larguar me vrap nga shtëpia,e kanë mbajtur frymën në polici dhe kanë bërë denoncimin përkatës. Ngjarja ka ndodhur në fshatin Mbrostar Ferko të rrethit të Fierit në familjen e shtetasit Xhemal Buzi. Bazuar në denoncimin e dy vajzave, policia i ka vënë prangat 50- vjeçarit Xhemal Buzi dhe tashmë do t'i takojë gjykatës që të vendosë se çfarë do bëhet me të.
Do ishte perfekte sikur të gjitha rastet e dhunës në familje të denoncohen në organet kompetente për të parandaluar valën e krimit që ka përfshirë vitet e fundit familjet shqiptare. Kjo ka ndodhur në orët e vona të së martës në fshatin Mbrostar Ferko të rrethit të Fierit kur dy vajza janë paraqitur të frikësuara në polici dhe kanë denoncuar babanë e tyre. "U zumë me të në shtëpi dhe pas një debati të gjatë ai u nxeh tej mase. Mori një thikë në dorë dhe na kërcënoi se do na vriste në rast se nuk e mbyllnim gojën",- thanë të tmerruara dy vajzat në policinë lokale. Kaq i ka mjaftuar uniformave blu të Fierit që të nisen urgjentisht në shtëpinë e Xhemal Buzit. Bazuar në denoncimin e dy vajzave, policia i ka vënë atij prangat. Pas kësaj policia ka ushtruar një kontroll në shtëpinë e familjes Buzi ku ka gjetur dy thika të mëdha dhe një krehër me 20 fishekë. Më pas hetuesit kanë marrë dëshminë e plotë të dy vajzave të 50- vjeçarit Buzi. Burime nga policia lokale pohuan se vajzat kanë shpjeguar të gjithë konfliktet që kishin pasur me babanë e tyre si dhe kërcënimet e bëra prej tij. Dy vajzat kanë rrëfyer me detaje gjithçka ka ndodhur në shtëpinë e tyre si dhe frikën për ndonjë veprim të mundshëm të babait të tyre. "Arrestimi i 50- vjeçarit Xhemal Buzi është kryer për veprën penale të armëmbajtjes pa leje të municioneve luftarake dhe armëve të ftohta, pasi në banesën e tij u gjetën dy thika dhe një krehër me 20 fishekë. Gjatë kësaj kohe, prokuroria do të analizojë denoncimin e bërë nga dy vajzat e tij dhe do të vendosë nëse do të ketë apo jo një akuzë për atë vepër penale",- thanë dje burimet zyrtare të policisë lokale