Motrat presin damarët pas dhunës seksuale nga fqinji

nga Musafir 2007-10-14, 13:25

TIRANË- Fqinji 50-vjeçar i ka ngacmuar seksualisht dhe të turpëruara për atë që u kishte ndodhur, kanë tentuar të vrasin veten. Dy motra të mitura janë shpëtuar nga të afërmit, teksa po tentonin vetëvrasjen duke prerë damarët, ndërsa policia njofton se pre e ngacmimeve seksuale kanë rënë dhe motra më e vogël e kushërira e tyre. Policia e kryeqytetit njoftoi dje arrestimin e Kristaq Lenës, 50 vjeç, i dyshuar për kryerje veprash të turpshme me të mitura, kanosje, nxitje të vetëvrasjes së mbetur në tentativë dhe dëmtime të tjera. Të gjitha këto krime, ai akuzohet t'i ketë kryer ndaj tre motrave dhe kushërirës së tyre me moshë 6, 14, 16 vjeçe dhe 12 vjeç. Pasi i kishte dhunuar në mënyrë të përsëritur, Lena akuzohet se i mbante nën presion vajzat, duke i kërcënuar se do t'iu vriste prindërit.

Zbulimi
Kanë qenë prindërit e 3 vajzave që kanë mësuar të parët historinë e tmerrshme.Nga të dhëna që ata kanë deponuar në polici rezulton se Lena, i cili duke qenë se banonte në afërsi të tyre me shtëpi, kishte mundësi të hynte shpesh në ndërtesë dhe duke shfrytëzuar këtë rast, ka ngacmuar duke kanosur vajzat. Duket se veprimi është përsëritur disa herë ndaj të katër vajzave, të cilat nuk kanë mundur të tregojnë, pasi sipas policisë ishin të kërcënuara nga 50-vjeçari. Ndërkohë, dy vajzat e mëdha, 14 dhe 16 vjeç, të turpëruara për atë që iu kishte ndodhur dhe duke pasur frikë t'ua tregonin familjarëve të tyre, kanë tentuar të vrasin veten. Burime nga policia thanë se ishte verifikuar që të miturat pasi ishin mbyllur në një dhomë kanë prerë damarët. Familjarë të tyre rastësisht kanë arritur të shmangin tragjedinë, duke iu shpëtuar jetën vajzave dhe prej tyre kanë mësuar edhe arsyet që i kishin shtyrë drejt vetëvrasjes. Menjëherë pas kësaj ata kanë denoncuar në polici krimin. Paraprakisht policia ka mundur të verifikojë se Lena kishte pasur mundësi të hynte dhe të dilte më shumë se një herë nga shtëpia e vajzave, pasi kishte mbajtur nën vëzhgim prindërit e tyre, ndërkohë që në një nga këto raste ai ka abuzuar edhe me kushërirën e vajzave 12-vjeçe që ndodhej për vizitë aty.

Arrestimi
Agjentët e policisë e kanë pasur të lehtë pas verifikimeve paraprake të kryejnë menjëherë ndalimin e Kristaq Lenës, idyshuar për krimet ndaj katër të miturave. Në një njoftim për shtyp policia tha se ai "dyshohet se ka konsumuar këto vepra penale, në kohë të ndryshme duke ushtruar dhunë fizike, psikologjike si dhe ngacmime seksuale mbi 4 vajzat e mitura". Ndërkohë, vajzat i janë nënshtruar ekspertizës mjeko-ligjore, e cila ka konfirmuar ngacmimin e tyre dhe tentativën për vetëvrasje. Pikërisht pas kësaj prokuroria ka prerë fletë arrestin për 50-vjeçarin që dyshohet si autor i katër veprave të rënda penale dhe ka ngritur për të akuzat e "Veprave të turpshme me të mitura", "Kanosjes", "Shkaktimit të vetëvrasjes e mbetur në tentativë" si dhe "Dëmtimeve të tjera me dashje". Nga të dhënat paraprake dyshohet se i arrestuari mund ta ketë kryer këtë edhe me të tjera të mitura të zonës, duke përdorur të njëjtat forma.Burime nga policia thanë se i arrestuari ka mohuar veprimet, por ndërkohë përballë tij janë dëshmitë e minoreneve dhe familjarëve të tyre, si dhe ekspertimi mjeko- ligjor, që vërteton ngacmimet seksuale për të cilat ai akuzohet.