Vesa Luma enderron te arrije ne MTV AWARDS

nga Musafir 2008-05-08, 18:28

Për herë të parë u bë e njohur në Shqipëri kur mori pjesë në spektaklin “Ethet e së premtes mbrëma”, në 2004-ën. Vesa Luma do të shfaqej atëherë me një zë të fortë impresionues që nuk do të kalonte pa bërë përshtypje. Dhe kjo përshtypje do vazhdonte të zgjaste për shumë kohë. Ndërsa studion për komunikim masiv, ajo e sheh veten njëkohësisht të mbështetur fort në pasionin e saj, që është kënga. Po përgatitet të hedhë në treg albumin e saj të parë dhe njëkohësisht po realizon dhe një videoklip të ri të një kënge kompozuar nga Florian Mumajesi, këngë kjo që, sipas Vesës, është mjaft e veçantë. Momentalisht ajo po bën turne nëpër Kosovë, ndërsa pret shtatorin për t’u përfshirë në evenimente muzikore dhe si një pjesë e madhe e këngëtarëve, siç shprehet vetë këngëtarja bionde, aspiron “MTV Music Awards”
Cilat janë planet tuaja aktuale në fushën e muzikës?
Jam në mbarim të videoklipit tim të ri, të këngës që e ka kompozuar Florian Mumajesi, është këngë e veçantë, prandaj dhe videoklipi do të jetë i tillë. Gjithashtu jam në realizimin e albumit tim të parë, i cili mendoj të dalë në shitje në dhjetor, shpresoj se do të ketë sukses, sepse kam punuar dhe vazhdoj të punoj shumë seriozisht në të.
A keni në plan të merrni pjesë në ndonjë eveniment muzikor së afërmi?
Momentalisht po bëj turne nëpër Kosovë, në pishina, që tashmë janë aktuale, dhe mendoj se janë më aktuale deri në shtator kur fillojnë evenimentet e rëndësishme, të cilat këtë vit do t’i frekuentoj.
Cilët janë këngëtarët tuaj të preferuar?
Layren Hill, Alicia Keys dhe normalisht Whitney Huston.
Tek “Kodi Binjak” keni kënduar këngët e Whitney Houston, e zgjodhët vetë të interpretoni këngët e saj?
Sa isha pjesëmarrëse në “Ethe”, gjithmonë me apo pa qëllim kam kënduar këngë të saj, andaj edhe organizatorët e “Kodit” menduan se mund të isha më e mira për ta prezantuar Whitney-n.
Nëse do të krahasonit zërin tuaj me të një këngëtareje me përmasa botërore, a do të ishte Whitney Houston, së cilës i përngjani më shumë?
Ndoshta edhe mund të thuhet, por unë mendoj se në rend të parë do ta kisha futur Alicia Keys, sepse edhe ajo ka zë të ngjirur sikurse unë.
Si është Vesa jashtë muzikës?
Thonë se jam shumë modeste, por të njëjtën kohë edhe ambicioze, jam e thjeshtë dhe e përshtatshme në çfarëdo shoqërie si dhe jam tip pozitiv.
Ku keni planifikuar t’i kaloni pushimet e verës?
Do të jem në shtëpi me familjarët e mi, sepse kam kaluar pak kohë me ta gjatë vitit, ky do të ishte pushimi im i preferuar. Ndodh dikur nga mesi i gushtit të bëj plazh në vendin më të bukur në botë, pra në Dhërmi, por akoma asgjë nuk është e sigurt.
Për çfarë studioni dhe në çfarë profesioni e shihni veten në të ardhmen?
Tash do të jem absolvente në komunikim masiv dhe e shoh veten si një gazetare dhe prezantuese e suksesshme, por që do ta kem këngën gjithmonë motiv.
Kush është personi që ju përkrah më shumë në karrierën tuaj muzikore?
Më përkrahin të gjithë njerëzit me të cilët jetoj dhe me të vërtet u jam falënderuese, sepse po të mos ishin ata nuk do të isha këtu ku jam.
Në cilën skenë ëndërroni të këndoni?
Si gjithë këngëtarët tjerë, mendoj në “MTV Music Award”.
Për të gjithë ata që s’e dinë kur keni kënduar për herë të parë?
Për herë të parë kam kënduar në një festival për fëmijë, kur kisha vetëm 5 vjeç. Atë kohë isha pjesë e një grupi të fëmijëve dhe organizonim festivale dhe koncerte të ndryshme, unë shumë shpesh isha soliste me këngë të kompozuara nga autorë të ndryshëm.
Kush e ka vënë re zërin tuaj fillimisht?
Nëna ime ishte, ajo që vuri re zërin tim, ndoshta sepse edhe ajo vetë në moshën e saj rinore ishte këngëtare.
Cila është kënga e parë me të cilën keni dalë përpara një publiku?
Kënga për fëmijë “Alo Alo Rebeka”, me të cilën në një nga festivalet tona fitova çmimin e parë.
Emocionet e daljes së parë në skenë?
Isha shumë e vogël, andaj nuk më kujtohet aq mirë, por gjithsesi duhej të kem ndier emocion të veçantë, zakonisht emocionet nuk di t’i shpreh me fjalë.
Nëse nuk do kishit marrë pjesë tek “Ethet e së premtes”, a kishit menduar se si mund të përfshiheshit seriozisht në muzikë?
Mendoj se do të kisha bërë të pamundurën për të ardhur deri te serioziteti i punës, ashtu siç e kam edhe natyrën, por me Ethet kam fituar një stazh të veçantë dhe e kam armën time më të fortë për çdo paraqitje apo prezantim.
A dini t’i bini ndonjë vegle muzikore?
Po, unë kam vijuar shkollën fillore dhe të mesme të muzikës, dhe di t’i bie flautit dhe pianos.