ALARM PER BOMB NE RINAS MBAHEN NE POLICI DY TE RINJT

Fiksimi i çuditshëm për t’i dhënë vetes adrenalinë për çanta me bombë të vendosura nëpër aeroporte u ka kushtuar shtrenjtë dy të rinjve nga kryeqyteti. Tashmë sektori i Antiterrorit në Policinë e Tiranës ka klasifikuar të dhënat për dy autorët e këtyre telefonatave, emrat e të cilëve nuk publikohen për shkak se hetimi nuk është përqendruar vetëm në lojërat e tyre me të fortë e policë, por edhe në qartësimin e njohjeve që ata kanë. Kështu, nga katër persona që u ndaluan pardje në një kabinë telefonike te liceu, policia e Tiranës ka mbajtur në ambientet e saj vetëm dy prej tyre. Dy 20-vjeçarët nga Tirana mendohet se kanë planifikuar dy telefonatat që lajmëronin për bombë në aeroportin “Nënë Tereza”. Nofka që i kishin ngjitur vetes si anëtarë të “Brigadës së Kuqe” ishte shkaku kryesor i alarmimit të gjysmës së policisë së Tiranës, por për fat të mirë të gjitha verifikimet vërtetuan se këta dy persona nuk kanë asnjë lidhje me këtë organizatë terroriste. Në një deklaratë për shtyp zëdhënësja e policisë së Tiranës, Alma Katragjini, thotë se “pardje rreth orës 13:28 shërbimi i sigurisë së aeroportit kombëtar “Nënë Tereza” është njoftuar përmes një telefonate anonime mbi vendosjen e një lënde eksplozive në ambientet e terminalit të aeroportit. Menjëherë në drejtim të aeroportit të Rinasit shkuan shërbimet policore, drejtues të policisë së Tiranës, shërbimet antiterror, specialistë antieksploziv dhe ekspertë xhenierë. Policia e Tiranës ka arritur të identifikojë dhe të hedhë dyshime konkrete për autorët e dyshuar të kësaj telefonate të rreme, ku nga këto struktura po punohet për dokumentimin e plotë ligjor të autorësisë. Dy muaj më parë strukturat e saj arritën të identifikojnë dhe të kapin telefonuesin, i cili ishte një minoren dhe kryente telefonata të herëpashershme në institucionin e organeve të rendit, ku u ndoq penalisht për kryerjen e kësaj vepre penale.”