Liga e Kampioneve,Tirana humb ne Norvegji 4-0 nga Stabaeku.

• Me mungesa të shumta dhe në një fushë të vështirë për shkak të barit artificial, kampionët e Shqipërisë nuk kanë mundur të bëjnë dot mrekullinë. Rezistenca e Tiranës zgjati vetëm çerek ore.

TIRANE- Tirana i ka dhënë lamtumirën Ligës së Kampioneve, pas disfatës 4-0 në Norvegji nga Stabaeku. Me mungesa të shumta dhe në një fushë të vështirë për shkak të barit artificial, kampionët e Shqipërisë nuk kanë mundur të bëjnë dot mrekullinë. Rezistenca e Tiranës zgjati vetëm çerek ore, pasi norvegjezët më pas ishin të papërmbajtshëm. Në minutat 16’ dhe 18’ u shënuan dy gola me anë të mbrojtësit Segerstrom. Që nga ky moment, në fushë ka patur vetëm një skuadër. Stabaeku ka humbur disa mundësi të tjera në pjesën e parë, por në fundin e saj ka gjetur edhe golin e tretë me autor suedezin Berglund. Në pjesën e dytë gjërat nuk kanë ndryshuar shumë në fushën e lojës, pasi skuadra norvegjeze nuk e ka ulur për asnjë moment ritmin. 10 minuta nga fillimi i kësaj pjese, vendasit arritën të realizojnë edhe golin e katërt, me autor Farnerud, që goditi fort nga hyrja e zonës. Tirana e mbylli ndeshjen me 10 vetë për shkak të kartonit të kuq të marrë nga francezi Mohelebi, i futur në fushë vetëm në pjesën e dytë.