VDESIN TRE PERSONA NE AKSIN SHKODER-LEZHE

SHKODER - Një aksident i rëndë me pasojë vdekjen e 3 personave ka ndodhur mesditën e sotme në aksin rrugor Shkodër-Lezhë në afërsi të fshatit Beltojë të Shkodrës. Një furgon I mbushur me pasagjerë i linjës Tiranë-Shkodër, është përplasur me një automjet të tipit benz, ku udhëtonin Dritan Zahi, 24 vjeç, Armand Hoxha 21 vjeç dhe Ludovik Popja 40 vjeç, të cilët mbetën viktima të aksidentit të rëndë. Njëri prej tyre u gjet pas kërkimeve në kanalin buzë autostradës. Ndërkohë nga pasagjerët e furgonit ka pasur 5 persona të plagosur, 3 nga të cilët u dërguan menjëherë në spitalin e Lezhës dhe dy të tjerë në spitalin e Shkodrës për të marrë ndihmën e parë mjekësore, ndërsa mësohet se nuk kanë pësuar dëmtime të rënda. Shkak i aksidentit të rëndë që mbajti të bllokuar për më shumë se 1 orë trafikun në autostradën Shkodër-Lezhë, është bërë shpejtësia tej normave me të cilën udhëtonte automjeti tip Benz I drejtuar nga 24 vjeçari Dritan Zahi.