FSHF-JA NDRYSHON RREGULLOREN PER SUPERLIGEN

FSHF dhe Klubet në bërjen e këtyre ndryshimeve u mbështetën në rregulloren e krijuar nga FIFA, duke e konsideruar këtë “nismë” si të rëndësishme në të mirë të futbollit në vend. Kështu, në prag të nisjes së sezonit të ri, organizatorët e kampionatit të futbollit kanë përcaktuar qartë se si do të procedohet nëse dy ose më shumë skuadra e përfundojnë kampionatin me pikë të barabarta. Nëse dy ose më shumë skuadra janë në kuotë të barabartë pikësh, atëherë në fillim do të merren pikët që kanë grumbulluar skuadrat në ndeshjet direkte. Më pas ajo që do të përcaktojë më “të mirin” do të jetë diferenca e golave të shënuar dhe pësuar në ndeshjet direkte, diferenca e golave të shënuar dhe pësuar në të gjithë kampionatin, numri më i madh i golave të shënuar gjatë gjithë kampionatit dhe në fund shorti. Drejtuesit e FSHF-së i argumentuan këto ndryshime me arsyen se bëhen për të përmirësuar nivelin e futbollit në kampionatet e ardhshme.
Ndëshkimi për kartonat e verdhë
Një temë tjetër me rëndësi për përfaqësuesit e klubeve ka qenë edhe ndryshimi i rregullores, për sa i përket masës së dënimit për lojtarët që arrijnë të grumbullojnë tre kartona të verdhë. Në bazë të rregullores, çdo futbollist që arrin të plotësojë këtë numër, dënohet nga institucioni numër një i futbollit shqiptar me dy ndeshje pezullim. Por për Klubet e futbollit të vendit kjo masë ndëshkimi konsiderohet si tepër e madhe. Për më tepër që sipas tyre kjo dëmton ekipet, pasi bën që të mungojnë lojtarë të rëndësishëm në formacion si dhe vetë nivelin e lojës, pasi bën që në fushë të hidhen futbollistë jo të të njëjtit nivel. drejtuesit e klubeve propozojnë që edhe kjo rregullore të ndryshohet. Ata kanë kërkuar që futbollistet të ndëshkohen me vetëm një ndeshje, pasi marrin tre kartona të verdhë dhe jo me dy siç përcakton rregullorja aktuale.