HASHASHI I SHKODRES ME I SHTRENJTI NE EUROPE

SHKODER- Hashashi shqiptar "thyen" tregun ndërkombëtar, duke u cilësuar si i kategorisë së parë. Burime të besueshme nga dikasteri i Rendit, bëjnë me dije se kanabis sativa që kultivohet në zonat e thella malore të rrethit të Shkodrës e të Malësisë së Madhe, ka çmimin më të lartë në Europë. Bëhet fjalë për çmim marramendës. Mësohet se 1 kilogram kanabis sativa e thatë kushton 530 euro. Sipas specialistëve, një bimë kanabis sativa (një rrënjë) peshon 1 kilogram. Pra, një rrënjë e asgjësuar në parcelat e kultivuara me bimë narkotike është e barabartë me 530 euro. Vetëm nga aksionet e ndërmarra nga Drejtoria e Policisë së Qarkut të Shkodrës, gjatë një muaji janë zbuluar e asgjësuar 46 mijë rrënjë hashash (46 mijë kg), që në total kapin vlerën e 24 milionë e 380 mijë euro. Sipas burimeve të mësipërme, kanabisi shqiptar është më i kërkuari në tregjet më të mëdha të vendeve kryesore të Europës. Kjo lidhet me kushtet në të cilat rriten bimët narkotike në zonat e thella në veri të vendit tonë. Kushtet e rritjes së kanabis sativës janë ideale. Temperatura, sasia e ujit dhe e dritës janë optimale për rritjen dhe zhvillimin e bimëve të hashashit. Ndërsa mbjellja e kanabis sativës në zonat malore është në sasi të konsiderueshme, ende nuk bëhet fjalë për një linjë stabël të tregtimit jashtë kufijve të vendit tonë të bimës narkotike. Sipas burimeve policore, ende nuk ka një linjë fikse për trafikimin e bimës narkotike, por malli lëviz sipas porosisë: Mali i Zi, Greqi e Kosovë dhe prej andej bëhet transportimi në destinacionet përkatëse. Holanda dhe Spanja zënë vendin e parë për blerjen e kanabisit shqiptar.
HARTA E ZONAVE PROBLEMATIKE
Në Qarkun e Shkodrës janë identifikuar të gjitha zonat e mbjella me kanabis sativa. Thuajse për çdo ditë, Drejtoria e Policisë organizon aksione për asgjësimin e parcelave të kultivuara me hashash në zonat e thella. Këtë periudhë është shënuar faza më e suksesshme për asgjësimin e kanabisit. Në aksionet anti-kanabis janë angazhuar mbi 200 forca policore njëherësh, por dhe efektivët e Ndërhyrjes së Shpejtë. Falë organizimit të mirë të punës, është bërë e mundur që këtë vit të asgjësohet sasia më e madhe e kanabis sativa, krahasuar me të njëjtën periudhë të viteve të kaluara. Aktualisht, policia po punon për zbulimin e punishteve artizanale, ku dyshohet se bëhet presimi dhe paketimi i bimëve të drogës. Ndërkohë, Drejtoria e Policisë së Shkodrës ka realizuar hartën e zonave të thella ku kultivohet kanabis sativa. "Kemi bërë hartën e drogës dhe nuk kemi lënë asnjë zonë jashtë. Është bërë një punë e madhe nga grupet e punës, të cilët kanë vlerësuar maksimalisht situatën. Për hartën na kanë ndihmuar dhe të dhënat e viteve të kaluara", - thotë drejtori i kësaj drejtorie, Nikolin Bala. Sipas tij, zonat më problematike janë: Shllaku, Shkreli, Guri i Zi, zona e Mazrekut, Temali dhe Kastrati në Malësinë e Madhe etj.
HETIMI
Kultivimi i kanabis sativës në zona të shpyllëzuara mbetet një nga problemet më të mëdha të policisë. Nga statistikat rezulton se në 95 për qind të rasteve, hashashi është mbjellë në toka pa pronar. Deri tani janë identifikuar vetëm 3 persona; njëri prej të cilëve është arrestuar dhe 2 të tjerë hetohen në gjendje të lirë. "Prej disa kohësh po bëjmë punë investiguese për identifikimin e personave që kultivojnë hashash në zona të shpyllëzuara. Punonjësit tanë kanë identifikuar disa prej autorëve të krimit. Kemi grumbulluar informacionet e nevojshme që t'i çojmë para drejtësisë personat për-gjegjës", - sqaron kreu i bluve, Nikolin Bala. Jashtë vëmendjes së policisë nuk do mbeten as kryepleqtë dhe kryetarët e komunave në zonat problematike për kultivimin e bimëve narkotike. Sipas Balës, Kodi Penal i ngarkon këta të fundi me përgjegjësi penale për mosdhënie informacioni për kultivimin e bimëve narkotike.

(s.g/GazetaShqiptare/Balkanweb)