MBYT VELLAIN E SE DASHURES ME LITAR

Një vrasje ka ndodhur gjatë natës, duke aguar dita e djeshme në fshatin Pishëporo të Rrethit të Fierit. Një 31-vjeçar ka vrarë njërin nga vëllezërit e së dashurës dhe ka plagosur rëndë vëllain tjetër. Ngjarja e rëndë ndodhi në kufijtë e dy lagjeve Pishë dhe Poro që formojnë fshatin bregdetar Pishëporo, që ndodhet 25 kilometra larg qytetit të Fierit. Sipas burimeve nga vendi i ngjarjes, në orën 21:30, dy vëllezërit Flogert dhe Xhulio Toska kanë dalë nga shtëpia që ndodhet në dalje të lagjes Poro për të shkuar në një dasmë që zhvillohej pak metra larg, në lagjen Pishë. Ata kanë hyrë në lokalin ku ishte hapur "kënga e dasmës" dhe janë argëtuar me të afërmit dhe shokët deri afër mesnatës, kur një person i lajmëroi se dikush i kërkonte jashtë lokalit. I pari ka dalë Flogerti, vëllai më i madh, më pas Xhulio, vëllai i vogël, vetëm 17 vjeç. Burimet nga fshati Pishëporo tregojnë se midis dy vëllezërve dhe tre djemve të tjerë është zhvilluar një debat i ashpër. Ndërkohë që policia tregon se Arben Dhamo, 31 vjeç, banor i fshatit Pishëporo, ka marrë zvarrë për disa metra vëllain e madh Flogertin. Pasi e ka afruar pranë një pjese me shkurre, ai e ka mbytur atë me litar. Ndërsa Xhulio Toska ndërhyn për të shpëtuar të vëllain, ai është plagosur një kaçavidë që autori mbante në dorë. Autori, duke menduar se vetëm i plagosi dy bashkëfshatarët, është larguar nga vendi i ngjarjes. Banorët e fshatit dhe dasmorët e shumtë kanë transportuar dy vëllezërit drejt spitalit rajonal të Fierit. Pak minuta pas mbërritjes në spital, 22-vjeçari Flogert Toska ka ndërruar jetë. Mjeku ligjor tha se vdekja e tij ka ardhur si pasojë e shtrëngimit të fortë në qafë. Ndërsa Xhulio Toska, sipas burimeve nga spitali, gjendet në kushte kritike për jetën. Mjekët thonë se ai ka marrë plagë me kaçavidë në pjesën e qafës. Policisë së Fierit nuk i është dashur shumë punë për të identifikuar autorin e ngjarjes, i cili mësohet të jetë Arben Dhamo. Forca të shumta policore i janë drejtuar menjëherë fshatit. Policia ushtroi kontroll në banesën e 31-vjeçarit Dhamo dhe në banesat e të afërmve të tij, ndërkohë që ka rrethuar të gjithë zonën. Burimet zyrtare të Policisë së Fierit pohojnë për gazetën "Shqip" se autori është kapur dje rreth orës 11:30, në thellësi të pyllit të Pishë-Poros. Mësohet se Dhamo nuk ka bërë qëndresë në momentin e rrethimit nga policia. Burime policore thanë se ai kishte disa plagë në trup, të cilat mendohet se i ka bërë vetë në tentativë për t‘u vetëvrarë. Sipas burimeve zyrtare të policisë mësohet se Arben Dhamo ka precedentë të mëparshëm penalë. Ai është dënuar më parë për veprën penale të vrasjes së mbetur në tentativë si dhe prodhim e shitje të bimëve narkotike. Burimet policore tregojnë se gjashtë vjet më parë, ai ka plagosur dajën e 22-vjeçarit, të cilën e vrau mbrëmjen e kaluar. Për këtë vepër penale, Dhamo u dënua me pesë vjet heqje lirie.