Superliga, Tirana dhe Vllaznia nuk ndalen.

Tirana dhe Vllaznia kanë fituar edhe në javën e 27-të të Superligës, duke e kthyer çështjen e titullit në një betejë vetëm midis tyre. Ndërkohë, Dinamo është mundur 2-1 nga Teuta dhe tashmë del nga loja për të fituar kampionatin. Fitore e rëndësishme edhe e Lushnjës kundër Apolonisë.

TIRANE- Tirana dhe Vllaznia kanë vazhduar me fitoret edhe në javën e 27-të të Superligës, duke vazhduar në krye të renditjes në kuotë të barabartë pikësh, nga 54 secila. Bardheblutë nuk kanë gabuar përballë Elbasanit, duke fituar pastër 3-0, në një ndeshje që megjithëse u zhbllokua në pjesën e dytë, u dominua nga skuadra e Kolës. Heroi i Tiranës edhe në këtë takim ka qenë Migen Memelli. Rezultati është zhbllokuar në fillimin e pjesës së dytë, kur Daniel Xhafa përfitoi nga një rrëmujë në zonë, duke e shtyrë topin për në rrjetë. Goli i dytë vjen 12 minuta para përfundimit, me autor kapitenin Devi Muka, i cili merr një top të artë nga Memelli. Pas një loje mjaft të mirë, sulmuesi pogradecar mbyll llogaritë me ndeshjen, duke shënuar golin e 17-të sezonal.

Ndërkohë, në Shkodër Vllaznia ka fituar 2-0 me Partizanin, duke ruajtur hapin e Tiranës. Në minutën e 24-t ishte Ndriçim Shtubina ai që shënoi golin e avantazhit, duke i çuar skuadrat me këtë rezultat në dhomat e zhveshjes. Në mesin e pjesës së dytë, Babamusta rrëzon në zonë Shtubinën dhe për gjyqtarin Jareci është penallti. Nga pika e bardhë Suan Lici vulos fitoren dhe mban Vllazninë në vend të parë, në kuotë të barabartë pikësh me Tiranën. Shkodranët javën e ardhshme do të udhëtojnë për në Durrës, aty ku herën e fundit janë mundur 4-0.
Në Selman Stermasi, Dinamo ka pësuar një humbje shokuese në shifrat 2-1 nga Teuta, duke i dhënë lamtumirë shanseve për të fituar titullin kampion. Matematikisht blutë janë ende në valle, por diferenca prej 7 pikësh nga dy skuadrat kryesuese, praktikisht e bën të pamundur që ata të jenë pretendentë. Rezultati u zhbllokua në minutën e 38-të nga Artion Poçi me një gol mjaft të bukur nga një goditje dënimi. Emiljano Vila arriti të barazonte vetëm 9 minuta nga fillimi i pjesës së dytë, ndërsa 3 minuta para përfundimit shënoi edhe golin e dytë dhe të fitores.

Në ndeshjet e tjera, Lushnja mposhti 2-1 Apoloninë, duke u barazuar me pikë me Partizanin. Sekseri e Bubeqi shënuan për vendasit, ndërsa për fierakët shkurtoi Dhrami. Në Peqin, Shkumbini mposhti 1-0 Besën, falë një goli të Mustafajt në fillimin e pjesës së parë. Ndërkohë, ndeshja e luajtur në Ballsh mes Bylisit dhe Flamurtarit përfundoi në barazim 1-1. Miqtë shënuan të parët me anë të Shehajt, ndërsa për Bylisin barazoi Klevis Dalipi.

(balkanweb)