Lohan pret hovin e qeverisë: Nuk ka viza pa reforma

• “Vështirë të ndodh liberalizimi i vizave në vitin 2009”, ka qenë kjo deklarata e kreut të KE-së në Tiranë, Helmut Lohan i cili ka prerë hovin e qeveritarëve shqiptarë për liberalizimin e vizave me Bashkimin Evropian gjatë vitit 2009. Lohan theksoi se qeveria shqiptare duhet të plotësojë kushtet për realizimin e këtij procesi. Deklarata e tij erdhi gjatë vizitës në Saranë ku u inaugurua Gjykata e këtij qyteti, që është një investim i Komisionit Evropian.

SARANDE- Kreu i delegacionit të Komisionit Europian në Tiranë, Helmut Lohan është shprehur me tone pesimiste në lidhje me realizimin e procesit të liberalizimit të vizave gjatë këtij viti. Lohan ka prerë hovin e qeveritarëve shqiptarë duke theksuar se procesi i liberalizimit të vizave me Bashkimin Evropian është shumë i vështirë të realizohet gjatë vitit 2009.
Kreu i KE në Tiranë ka bërë thirrje për angazhim maksimal në realizimin e reformave në mënyrë që të plotësohen kushtet për këtë proces.

“Shqipëria do të ketë liberalizim vizash kur të jenë plotësuar gjithë kushtet që janë parashtruar në dokumentin MAP për legalizimin e vizave dhe besoj se do ishte më realiste të mendonim se këto kushte kanë për tu plotësuar në vitin 2010, se sa sic shpresohet në 2009-ën” është shprehur nga Saranda, Helmut Lohan.

Gjatë vizitës së tij në Sarandë, Lohan përurori godinën e rikonstruktuar të gjykatës së shkallës së parë, projekt ky në kuadër të ndihmës që Komisioni Europian jep për realizimin e plotë të reformës në drejtësi në vend. Komisioni Europian ka investuar për këtë projekt rreth 410 mijë euro.

Kreu i delegacionit të Komisionit Europian në Tiranë, po gjatë ditës së sotme vizitoi edhe Gjirokastrën ku këshilloi autoritetet shqiptare, të zhvillojnë zgjedhjet dhe më pas aplikimin për në BE. Nga Gjirokastra Lohan i vlerësoi zgjedhjet si vendimtare që Shqipëria të synojë pjesmarrjen si vend kandidat. Nga qyteti i gurtë, Lohan i ka bërë thirrje forcave politike të përballojnë me sukses zgjedhjet e 28 qershorit.