Vrasje në Shkodër, një i vdekur një i plagosur.

• Një person plagoset dhe një tjetër vdes, është ky bilanci i një ngjarje të rëndë të ndodhur mbrëmjen e sotme në qytetin e Shkodrës. Një 50 vjeçar ka qëlluar tre herë me thikë kreun e komunës Pult të Shkodrës duke e lënë atë të plagosur, ku ky i fundit më pas e ka qëlluar me armë zjarri viktimën. Ende nuk dihen motivet e kësaj ngjarjeje. Policia ka mbërritur në vendin e ngjarjes për të zbardhur më tej atë.

SHKODËR- Një vrasje ka tronditur mbrëmjen e sotme qytetin e Shkodrës, ku ka mbetur i vdekur një person dhe një tjetër është plagosur. Viktima është 50 vjeçari Dodë Hili, i cili është qëlluar me armë zjarri nga Martin Cubi. Ndërkohë ky i fundit para pak se të kryente vrasjen e 50 vjeçarit është qëlluar tre herë me thikë nga ana e viktimës. Mësohet se Cubi është kreu i komunës Pult të rrethit të Shkodrës.

Aktualisht ai ndodhet i shtruar në reaminacionin e spitalit rajonal të Shkodrës dhe është në gjendje të rëndë për jetën. Ngjarja e rëndë ka ndodhur pranë një lokali në zonën e spitalit të këtij qyteti, ku fillimisht ka pasur një grindje të momentit mes dy personave.

Ka qenë 50 vjeçari i cili ka goditur fillimisht tre herë me thikë kreun e komunës Pult. Ndërkohë policia ka mbërritur menjëherë në vendin e ngjarjes për të zbardhur më tej këtë vrasje dhe shkaqet që çuan në të. Ende nuk dihen motivet e saj.