Polican,grabitet posta,vidhen 1.5 milion lekë të pensioneve.

• Nga hetimet paraprake mësohet se grabitësit duke përfituar nga errësira dhe mungesa e rojeve kanë shqyer derën e postës dhe kanë grabitur shumën e parave që ishte caktuar për t’ju shpërndarë pensionistëve të këtij qyteti.

POLICAN- Persona ende të paidentifikuar kanë grabitur gjatë orëve të natës filialin e postës e cila ndodhej në qendër të qytetit të Policanit në qarkun e Beratit. Sipas të dhënave të para të policisë nga hetimet paraprake grabitësit kanë hyrë në postë nga lokali ngjitur që kishin një mur të përbashkët. Mësohet se grabitësit, duke përfituar nga errësira dhe mungesa e rojes kanë shqyer derën e lokalit, kanë hapur murin ndarës dhe kanë hyrë në filial.

Policia thotë se shuma e parave prej 1.5 milionë lekë e grabitur ishte destinuar për t’ju shpërndarë pensionistëve të këtij qyteti.
Për momentin nuk ka ende asnjë të dyshuar për ngjarjen. Për grabitjen ka reaguar dhe kreu i bashkisë së Policanit Adriatik Zotka i cili është shprehur se i kishte bërë disa herë apel drejtuesve të policisë për të shtuar patrullat në rrugët e qytetit gjatë orëve të natës por ky apel, ka rënë në vesh të shurdhët nga uniformat blu.