Gërdeci, Gjykata e Lartë shtyn seancën më 22 maj.

• Gjykata e Larte shtyn për më 22 maj seancën për dosjen “Gërdeci. Shkak është bërë kërkesa të pandehurve për vecim të dosjes, duke kërkuar të gjykohen nga Gjykata e shkallës së parë, per shkak se nuk janë persona me imunitet.

TIRANE-Gjykata e Lartë shtyn më 22 maj seancën për Gërdecin
Ora 16:00 Gjykata e Larte shtyn për më 22 maj seancën për dosjen “Gërdeci. Shkak është bërë kërkesa e të pandehurve për vecim të dosjes. Të pandehurit kanë kërkuar të gjykohen nga Gjykata e shkallës së parë, me pretendimin se nuk janë persona me imunitet.
Në 22 maj Gjykata e Lartë do të vendosë nëse Fatmir Mediu do të gjykohet së bashku me 28 të pandehurit e tjerë të tragjedisë, apo dosja do të vecohet dhe të pandehurit e tjerë do të gjykohen fillimisht në Gjykatën e Tiranës. Sot Gjykata e Lartë rrëzoi Prokurorinë që kërkoi përjashtimin e tre gjyqtarëve nga kolegji penal për konflikt interesi.
Avokati mbrojtjes i Fatmir Mediut ka qënë i rezervuar lidhur me publikimin në media të tabulateve telefonike të bisedave më 15 mars 2008. Shumë shkurt, avokati Visha tha se gjithcka zhvillohet në sallën e gjyqit dhe se nuk do të bëjë komente të tjera.

Gjykata e Lartë: Kërkesa e prokurorisë e pabazuar në ligj
Ora 12.50 Rrëzohet kërkesa e prokurorisë për përjashtimin i tre gjyqtarëve nga kolegji penal që gjykon dosjen “Gërdeci” . Kolegji i gjyqtarëve i kryesuar nga kryetarja e Gjykatës së Lartë hodhi poshtë kërkesën e prokurorisë si të pabazuar në ligji. Kreu i grupit të prokurorëve Sokol Stojani në seancën e sotme kërkoi largimin e kryetarit të Kolegjit Penal Besnik Imeri, dhe gjyqtarët Evgjeni Sinoimeri dhe Irma Bala për konflikt interesi

Prokuroria: Gjyqtarët kanë konflikt interesi
Ora 11: 10 - Prokuroria kërkon përjashtimin e kryetarit të Kolegjit Penal të Gjykatës së Lartë, që ka në dorë gjykimin e çështjes si dhe 2 gjyqtarëve të tjerë të këtij kolegji. Prokuroria kërkon largimi i gjyqtarëve Besnik Imeri, Evgjeni Sinoimeri dhe Irma Bala. Sipas Prokurorisë gjyqtari që drejton Kolegjin Penal, Besnik Imeri ka lidhje të ngushtë miqësie me ish kryetarin e Komisionit Qendrorë të Zgjedhjeve Ilirian Celibashi që është kunati i Fatmir Mediut dhe mbrojtësin ligjor të këtij të fundit Ardian Vishën.
Gjyqtaria Irma Bala dhe Evgjeni Sinoimeri sipas Prokurorisë kanë shqyrtuar kërkesat që kanë të bëjnë me sekuestron mbi pasuritë e Mihal Delijorgjit dhe caktimin e masës së sigurisë. Kolegji Penal i kryesuar nga kryetarja e Gjykatës së Lartë Shpresa Beçaj pasi dëgjoi pretendimet e palëve vendosi rrëzimin e kërkesës së Prokurorisë me argumentimin se nuk është i bazuar në ligj dhe nuk ka shkaqe të arsyeshme.

Gërdeci, Gjykata e Lartë hap procesin, mungon Mediu
Ora 10:40 Në Gjykatën e Lartë nis seanca e dytë gjyqësore në ngarkim të 29 të pandehurve për tragjedinë e Gërdecit, 15 mars 2008. Ish-ministri i mbrojtjes Fatmir Mediu, një ndër pandehurit, nuk është i pranishëm në seancë por përfaqësohet nga avokati i tij, Ardian Visha.
Nga 29 të pandehur të cilët prokuroria i ka ulur në bankën e të akuzuarve si përgjegjës për shpërthimin e fabrikës së demontimin “Albademil”, vetëm 4 janë të arrestuar. Ish-drejtori i kompanisë shtetërore MEICO, Ylli Pinari, administratori i kompanisë "Alba Demil", Mihal Delijorgji dhe ish-drejtorin teknik të fabrikës së çmontimit të municioneve, Dritan Minxolli, si dhe ish punonjësi i MEICO-s Sokol Gjeci.
Në seancën e sotme gjyqësore, i pranishëm nga të pandehurit e arrestuar mësohet se është vetëm Gjeci, ndërsa 3 të pandehurit e tjerë përfaqësohen nga avokatët mbrojtjës.
Procesi gjyqësor për tragjedinë e Gërdecit nisi javën e kaluar por u shty për shkak të mosparaqitjes së disa të pandehurve, si dhe disa avokatë nuk kishin prokurën përkatëse që i lejonte të përfaqësonin klientin e tyre në gjykim.
Të pandehur që gjykohen në gjendje të lirë janë ish-ministri i Mbrojtjes, Fatmir Mediu; ish-shefi i Shtabit të Përgjithshëm të Ushtrisë, Luan Hoxha; zëvendësi Agim Lala, Shpëtim Spahiu, Zija Bahja, Ramadan Tartari, Ndue Marku, Sokol Gjeçi, Ardian Mullahi, Adriatik Mema, Shkëlzen Madani, Dashnor Çaushaj, Zenun Fero, Hysni Coçka, Hilmi Laçaj, Fari Toska, Rezart Tërshana, Besnik Dauti, Agim Babameto, Fiqiret Mato, Lavdi Shatro, Gëzim Oshafi, Denis Hajdari, Jorgo Mino dhe Fatbardh Kuçi.