Zbulohen kontaktet midis Delijorgjit dhe Shkelzen Berisha

• Asnjë reagim nga familja kryeministrore pas publikimit nga Gazeta Shqiptare e News24 i tabulateve që dëshmojnë se Delijorgji, 38 min pas shpërthimit në Gërdec, i ka telefonuar Shkëlzen Berishës. I vetmi reagim ishte vizita e Berishes, në shtëpinë e një prej viktimave.

TIRANE-Asnjë reagim nga familja kryeministrore pas publikimit nga Gazeta Shqiptare dhe News24 i tabulateve telefonike që deshmojne se Mihal Delijorgji, vetem 38 minuta pas shperthimit ne Gerdec, i ka telefonuar Shkelzen Berishës. I vetmi reagim ishte vizita e kryeministrit, në shtëpinë e një prej viktimave të Gërdecit, ku dhe ka premtuar se do të dhurojë një kompjuter për studentet që humbën babain.

Ditën që Gazeta Shqiptare botoi ekskluzivisht lajmin se djali i kryeministrit është telefonuar disa herë pas shpërthimit në Gërdec nga dy persona që sot janë nën hetim për ngjarjen e rëndë, kryeministri zgjedh të vizitojë familjen e një viktime të të njëjtës tragjedi.
Zyra për shtyp e kryeministrit bëri të ditur sot vizitën që kreu iqeverisë bëri në familjen e Reshit Krujës, një prej 26 viktimave që humbën jetën në tragjedinë e Gërdecit.

Në këtë vizitë që nuk dihet se përse nuk u krye ditën e përvjetorit të parë të tragjedisë, 15 Mars, por u zgjodh pikërisht sot, Kryeministri Berisha shoqërohej nga Kryetari i Bashkisë së Vorës, zoti Fiqiri Ismaili dhe nga deputeti i zonës për PD, zoti Astrit Patozi.
Zyra për shtyp njoftoi gjithashtu se ka qënë zonja e shtëpisë, bashkëshortja e të ndjerit, që i uruan mirëseardhjen Kryeministrit Berisha duke e falënderuar për kujdesin dhe mbështetjen në momentet e vështira të familjes së tyre.

Kryeministri Berisha nga ana e tij siguroi pjesëtarët e familjes Kruja për përpjekjet e tij maksimale në mbështetje të interesave të tyre, duke shprehur angazhimin se qeveria në bashkëpunim me pushtetin lokal do të jetë gjithnjë pranë tyre.
Gjithashtu Kryeministri Berisha theksoi se drejtësia që familjarët kërkojnë, duhet dhe do të vihet patjetër në vend dhe për këtë qeveria ka dhënë dhe po jep të gjithë mbështetjen e saj.

Por, bashkëshortja e të ndjerit Reshit Kruja kërkoi një ndihmë të menjëhershme për vajzat e saj, të cilat ndiqnin universitetin. Dhe kërkesa e saj ka qënë minimalisht e vogël, përpara fatkeqësisë që goditi familjen. Ajo kërkoi një kompjuter në shtëpinë e saj, i cili ju premtua menjëherë nga Kryeministri Berisha dhe Deputeti Patozi. “Ata i shprehën gatishmërinë që një kompjuter do t’i shkonte kësaj familjeje menjëherë në ditët e ardhshme”, mbyllet njoftimi për shtyp i faqes zyrtare të Këhsillit të Ministrave që nuk shton asnjë arsye më tepër se pse Berisha zgjodhi pikërisht këtë familje për vizitë dhe këtë datë.

Familjarët e viktimave të Gërdecit përkujtuan më 15 Mars të dashurit e tyre që humbën jetën nga shpërthimi i fabrikës së demontimit të armëve. Kjo ditë u kujtua në një formë proteste të heshtur dhe nga opozita, dhe asnjë formalitet nuk u krye ndërkaq nga qeveria. Sot kur Gazeta Shqiptare publikoi se djali i kryeministrit që më parë ka mohuar të jetë përfshirë në tregtinë e armëve në Gërdec, në të vërtetë është telefonuar nga ish-ministri Mediu dhe administratori i Alba-Demil Mihal Delijorgji pas shpërthimit të fuqishëm të fabrikës që mori jetën e 26 personave dhe plagosi 300 të tjerë. Nuk dihen ende arsyet se përse janë kryer këto telefonata dhe për cfarë është vënë në dijeni djali i kryeministrit nga të lartpërmendurit, vetëm disa minuta pas shpërthimit të fabrikës.