Berisha në familjen e viktimës.E shoqja:Pres mik dhe armik

• Zbulohet shkaku i vizitës së Berishës në familjen e një viktime të Gërdecit. E veja e Reshit Krujës është punonjëse e Bashkisë Vorë dhe me rrogën që i jepet mban 3 jetimët e saj pas tragjedisë. Për të pritur Berishën në shtëpi ia kërkoi kryetari i Bashkisë.

VORE- Një vit më pare Mimoza Kruja humbi të shoqin Reshitin 47 vjeçar, i cili në mesditën e 15 marsit 2008 shkoi të punonte si çdo ditë roje në fabrikën e çmontimit në Gërdec. Pas një viti veç 75 mijë lekeve të vjetra në muaj si pension për vajzën e mitur, Mimoza punëtore në Bashkinë e Vorës, rrëfen vizitën e kryeministrit Berisha pikërisht në ditën kur “Gazeta Shqiptare” faktoi lidhjen e djalit të kryeministrit Shkëlzen Berisha me biznesmenin e Gërdecit Mihal Delijorgji.

”Mirëpres mikun, por edhe armikun”, shprehet nëna e tre vajzave, ndërsa fajëson shtetin si shkaktarin e 26 viktimave mes të cilave edhe njeriun e saj të shtrenjtë.
“Jam pastruese në Bashkinë e Vorës. Ndërkohë nënkryetari i Bashkisë Aqif Muça, më tha që kryeministri do të bëjë një vizitë në Vorë, po i thashë do ta pres siç kam pritur të gjithë. Por më tha që në bazë të axhendës së tij në Vorë e ka planifikuar edhe një vizitë në shtëpinë tënde. Të urdhërojë i thashë, qoftë kryeministri qoftë kushdo, dera ime është e hapur për këdo. Në shtëpi unë do të pres qoftë mikun qoftë armikun, kjo është në traditë të shqiptarit. Ai më erdhi në shpi, unë do ta pres. Derisa gjykata nuk ka nxjerr një fajtorë, për mua fajtorë mbetet shteti”- u shpreh Zonja Kruja në fjalën e saj.

Në shtëpinë e saj ka mbërritur kompjuteri i premtuar nga Sali Berisha, por kjo sipas Mimozës është vetëm 1 e 10 e nevojave të saj për të jetuar.
“Shpresoj shumë që premtimi i dhënë nga kryeministri që pensioni do të na lidhet me 300 mijë lekë të na vijë në ndihmë”- tha Mimoza Kruja.
Bashkë me familjarët e 25 viktimave të tjera të Gërdecit Mimoza Kruja është pjesë e procesit gjyqësorë të hapur në Gjykatën e Lartë. Ajo ka ndjekur seancat e para në sallë, por ngre zërin për mungesën e të pandehurve, sidomos të njerëzve më kryesorë në hetime.

“Në sallën e gjyqit paraqiten vetëm avokatët, kur një njeri është i akuzuar pse të mos paraqitet, por vetëm pse është një njeri me post, po të ishte një njeri i thjeshtë do ishte. Fatmir Mediu, pse të mos paraqitet, kanë qenë të pranishëm vetëm dy avokatët e tij, ndërkohë që ai vetë del e bën fushatë elektorale, pak më parë e pashë që ishte në Laç. Të na japi një shpjegim, një përgjigje është apo s’është fajtor, duhet të paraqitet në gjyq”- theksoi Mimoza në fjalën e saj.

Mimoza Kruja edhe pse banon vetëm pak metra larg Bashkisë ku ndodhi tragjedia, jeton me 150 mijë lekë të vjetra të pagës së saj si punëtore e pastrim-gjelbërimit në Bashkinë e cila që nga viti 2007 drejtohet nga demokratët. Nëna e tre vajzave 2 prej të cilave ndjekin shkollën e lartë nuk mohon situatat kur disa herë bijat e saj kanë dashur të lenë shkollën. Por nuk i ka lejuar ta bëjnë një gjë të tillë, pavarësisht se thuajse çdo muaj merr para borxh tek komshinjtë e saj, para me të cilat ka kryer edhe ritet përkujtimore për bashkëshortin e saj të ndjerë.