Zgjedhjet, Lohan: Test për Shqipërinë, BE ndjek procesin.

• Pak më shumë se dy javë para zgjedhjeve të 28 qershorit KE kujton se BE po ndjek me vëmendje të gjithë procesin. Ambasadori Helmut Lohan tha se KE i konsideron këto zgjedhje si një test të rëndësishëm për vendin. Komuniteti ndërkombëtar ka përsëritur shpesh herë se pret që zgjedhjet të certifikohen si të lira e të ndershme.

TIRANE- Pak më shumë se dy javë para zgjedhjeve të 28 qershorit Komiosni Europian i kujton politikës shqiptare se Bashkimi Europian po pret me vëmendje të madhe plotësimin e kushteve bazë që zgjedhjet të certifikohen si të lira e të ndershme. Ambasadori i Komisionit Europian në Shqipëri, Helmut Lohan gjatë një aktiviteti me ministrien e Integrimit tha se KE i konsideron këto zgjedhje si një test shumë të rëndësishëm për vendin.

“Jemi pak më shumë se 2 javë para zgjedhjeve dhe Shqiperia ka shansin të demostrojë se ka arritur nivelin bazë të pjekurisë demokratike dhe kapacitetin për të organizuar zgjedhje të lira e të ndershme, në përputhje me standartet ndërkombëtare. BE dhe partnerët e tjerë të Shqipërisë po ndjekin me kujdes dhe me përqëndrim të madh këtë test të demokracisë” theksoi Lohan.

Deklarata e kreut të Komisionit Europian u bë gjatë një aktiviteti për mbylljen e projektit të asistencës teknike, një projekt prej 2 milion e gjysëm eruro, i cili asistoi qeverinë në rritjen e kapaciteteve administrative. Komuniteti ndërkombëtar ka përsëritur shpesh herë kohët e fundit se pret me padurim që zgjedhjet të certifikohen si të lira e të ndershme. Ndërkohë, klima politike në vend sa vjen e bëhet më e nxehtë, me afrimin e datës së zgjedhjeve.