Kriza, Berisha e Rama: Efektet po ndihen në vend.

• Shqipëria po ndjen efektet e krizës ekonomike globale. Këtë e pranojnë edhe dy liderët e politikës shqiptare, kryeministri Sali Berisha dhe lideri i opozitës Edi Rama, në prag të zgjedhjeve. Komentet e dy liderëve përbëjnë pjesën e dytë të intervistës nga agjencia e lajmeve “Reuters”.

TIRANE- Shqipëria po ndjen efektet e krizës ekonomike globale dhe këtë e kanë pranuar edhe dy liderët e politikës shqiptare kryeministri Sali Berisha dhe lideri i opozitës Edi Rama, në prag të zgjedhjeve të përgjithshme të 28 qershorit. Agjencia britanike e lajmeve “Reuters” ka botuar pjesën e dytë të intervistës me të dy liderët e politikës shqiptare duke u fokusuar tek situata ekonomike dhe impakti i krizës globale.

I pyetur nëse Shqipëria është prekur nga kriza kryeministri Berisha u shpreh, “ndoshta po preket, por absolutisht nuk është në krizë të thellë. Jo, dhe për këtë jam i sigurt, ekonomia jonë është një ekonomi e frytit të një pune të madhe dhe të lodhshme”- tha Berisha.

Ndërsa kryebashkiaku i Tiranës njëkohësisht dhe lideri i opozitës Edi Rama për efektet e krizës shprehet, “Shqipëria nuk është e integruar plotësisht në sistemin financiar ndërkombëtarë. Dobësia jonë është bërë forca jonë, por në të njëjtën kohë jemi të prekur nga të ardhurat e emigrantëve që jetojnë në Itali, Gjermani, Amerikë e të tjerë dhe sigurisht kjo ka ndikim. Nga ana tjetër mbetet shqetësuese vështirësia e mjaft kompanive që punojnë me botën e huaj”- tha Rama.

Përballë thënieve të dy politikanëve intervistohen edhe qytetarë e biznesmen të vegjël, të cilët thonë se pa diskutim efektet e krizës po ndjehen edhe në Shqipëri.

“Ne dikur këtë çadër e shisnim 300 mijë lekë, sivjet jemi të detyruar ta japim 100 mijë lekë vetëm të mos mbetemi pa shitur. Kjo është për efekt të krizës që ka mbërthyer të gjithë vendin, të mos e përjashtojmë dhe veten tonë që jemi të prekur”- shprehet njëri prej biznesmenëve të vegjël, i cili merret me prodhimin e çadrave.

Të prekura janë edhe kompanitë e huaja që operojnë në Shqipëri. Kështu pronari grk i një fabrike në vendin tonë shprehet se tashmë kriza po ndjehet edhe në biznesin e tij. Porositë për rrobaqepësinë e tij janë pakësuar, por gjithçka mbetet për tu parë vitin që vjen, sipas raporteve të institucioneve globale financiare Shqipëria nuk është zyrtarisht në recesion, por eksporti dhe tregtia ka rënë, si dhe të ardhurave të emigrantëve ç’ka tregon se kriza ka nisur të ndihet.