Zgjedhjet, policia plan masash për mbarëvajtjen e proçesit.

• Policia e Tiranës deklaron se ka marrë një sërë masash që garantojnë një proces të qetë dhe normal votimi ditën e diel. Sipas ligjit policia do te sigurojë 823 Qendra Votimi në Tiranë, kurse 458 punonjës policie po nga Tirana do të angazhohen me detyrë edhe në qarqe të ndryshme të vendit.Të gjitha automjetet e policisë të angazhuara në detyra zgjedhore do të mbajnë në xhamin e përparmë të tyre tabelën me siglën “Automjeti i Policisë i angazhuar me detyra zgjedhore”.

TIRANE- Policia e Tiranës shpall një sërë masash që do ti shërbejnë sipas saj ecurisë së një procesi normal votimi ditën e dielë. Drejtoria e Përgjithshme e Policisë së Shtetit thuhet në një deklaratë të policisë së Tiranës I ka përcjellë Komisionit Qendrorë të Zgjedhjeve listën e punonjësve të policisë që do të angazhohen për sigurimin e objekteve zgjedhore dhe shoqërimin e komisioneve dhe materialeve zgjedhore nga Qendrat e Votimit për tek vendet e numërimit të votave. Policia deklaron se gjatë të gjithë fushatës elektorale në Tiranë janë zhvilluar 190 tubime dhe takime elektorale, të kryera këto kryesisht pa asnjë incident.
Policia e Tiranës ka vënë në dispozicion 458 punonjës të trajnuar, të cilët do të angazhohen në detyrat e policisë gjatë zgjedhjeve për Kuvendin e Shqipërisë në qarkun e Dibrës, Elbasanit, Fierit dhe Korçës.

Zgjedhjet për parlamentin e ri në qarkun e Tiranës do të zhvillohen në 823 Qendra Votimi, të cilat do të sigurohen nga punonjësit e policisë së gjashtë komisariateve të Tiranës dhe të Kavajës. Personeli policorë është i pajisur me dokument identifikimi, ku përmbahet aty fotografia, grada, emri dhe mbiemri i punonjësit të policisë, numri i kutisë si dhe numri i Qendrës së Votimit, apo Komisioni Zonal i Administrimit të Votave. Të gjitha automjetet e policisë të angazhuara në detyra zgjedhore do të mbajnë në xhamin e përparmë të tyre tabelën me siglën “Automjeti i Policisë i angazhuar me detyra zgjedhore” me targën përkatëse, firmën dhe vulën e institucionit.

Policia e Tiranës deklaron gjithashtu se janë marrë të gjitha masat për sigurimin e Komisioneve Zonale, të cilat janë vendosur në 16 objekte zgjedhore dhe aktualisht po merren masa për marrjen në ruajte për Qendrat e Votimit, brenda orës 16:00, të kësaj të shtune.