Bora Meta: në mbrojtje të babait të saj.

Koalicioni i shumëpërfolur mes Partisë Lëvizja Socialiste për Integrim me Partinë Demokratike, duket se ka përshirë një pjesë të mirë të shqiptarëve që kanë mbetur të befasuar nga kjo zgjidhje. E krahas bisedave me njeri-tjetrin në tavolina kafeneje ose zyra pune, një tjetër vend ku diskutohet shumë është dhe sajti i njohur interaktiv, "Facebook". Pikërisht në faqen e bashkëshortes së kryetarit të LSI-së dhe një ndër kandidateve për deputete për këtë forcë, Monika Kryemadhi, është ndezur një diskutim shumë i zjarrtë në lidhje me këtë zgjedhje... Një ndër personazhet më aktive me komente është dhe vajza më e madhe e çiftit, Bora Meta, e cila është vënë në mënyrë shumë të vendosur në mbrojtje të zgjedhjes që ka bërë i ati. Kështu, 11-vjeçarja ka kundërshtuar shumë opinione dhe ka mbrojtur babanë e saj nga ata që e kanë cilësuar jo të mirë vendimin e kreut të Lëvizjes Socialiste për Integrim, për të bërë koalicion me PD-në.

Komentet
Faqja personale e Monika Kryemadhit në sajtin në facebook.com është "përmbytur" nga komentet e shumta të personave, dashamirës ose jo, që shprehin opinionin e tyre në lidhje me vendimin e fundit të marrë nga Ilir Meta. Të shumtë janë ata që e akuzojnë kryetarin e LSI-së, se ka tradhtuar bindjet dhe idealet e tij të majta. Ndërkohë që një pjesë tjetër e përshëndesin zgjedhjen e tij dhe i urojnë suksese të mëtejshme. Komenteve e atyre që e cilësojnë të gabuar këtë vendim, kanë marrë përgjigje nga një anëtar i familjes Meta, që për çudinë e të gjithëve nuk është as Iliri dhe as Monika. Kështu, bashkëpunimin ose një koalicion të mundshëm mes të majtëve, që shumë nga pjesëmarrësit kanë konsideruar si një zgjedhje të mundshme, 11-vjeçarja e argumenton kështu: "Ju e sulmuat më shumë... A thoshit ju vota për LSI-në është vota për Salinë? Ne ju dhamë 7 herë dorën dhe ju na fundosët... Kështu që tani mirë t'ju bëhet!". Ndërkohë që për pasaktësitë në zgjedhje dhe sjelljes jokorrekte të PS-së, ajo reagon kështu: "Në datë 27-28 qershor shihni sa lekë ka tërhequr Abazi, vetëm që Monika Kryemadhi të humbte... Pu, pu... Çfarë keni bërë... Po mos kini merak, sepse Edi Rama e ka të shkurtër qëndresën në PS, pas 1 javë thojini Ben Blushit ose Nanos, "hello". Por gjithashtu, nga debati politik i trashëgimtares Meta vjen dhe një gjykim për kryetarin aktual të PS-së, Edi Rama: "Politika ashensor është... Pa shikoni liderin e Partisë tuaj, që thotë unë nuk jam politikan... Po nëse ai nuk është politikan, nuk mund të udhëheqë një parti politike, plus që PS na bëri dhe kodin kundër... Kështu që shkoni të festoni 45-vjetorin e Edvinit dhe mos u qani më"!

Politika e Bora Metës
Dhe pse është vetëm 11 vjeç, Bora ka mjaft njohuri për politikën, gjë që duket dhe nga përgjigjet që jep në mbrojtje të të atit. Vajza më e madhe e çiftit Meta-Kryemadhi ka qenë shumë prezente gjatë fushatës në zonën e Dibrës, ku Monika ka qenë kandidate, duke u kthyer paksa në "krahu e djathtë" të së ëmës gjatë fushatës elektorale. Pikërisht këtë përkushtim të madh, Bora duket se e ka dhe në mbrojtje të të atit të saj. Por arsyetimet dhe përgjigjet e Borës kanë krijuar gjithashtu edhe skepticizëm, ku shumë nga diskutuesit kanë hedhur idenë se ajo mund të mos jetë Bora e vërtetë.

Familja
Çifti Meta-Kryemadhi tashmë i gëzohet një familjeje të bukur, me dy vajza dhe një djalë. Bora është vajza më e madhe e çiftit dhe ka lindur më 8 korrik 1998. Borës ia ka vënë emrin Monika, sepse dhe kur ajo ka qenë e vogël, të gjitha kukullat që kishte quheshin Bora. Krahas saj ata kanë dhe dy fëmijë më të vegjël, që quhen Era dhe Besart.