Spartak Ngjela:Afera Berisha-Meta do të dështojë ne vjeshte.

Si në çdo aferë, dhe kjo është një lidhje biznesi, më jep të të jap... Ilir Meta i dha maxhorancën Berishës, dhe mori benefi cën e kësaj... E rëndësishme është të mendojnë sesi do të qeverisin këta të dy. Kjo duhet pritur. E megjithatë, nuk ma ha mendja se duhet pritur që kjo qeveri ta kapë vjeshtën”! - kështu e komenton avokati dhe lideri i partisë Ligj dhe Drejtësi, koalicionin e ri qeverisës. Aspak optimist, ai tregon se nëse opozita nuk hyn në Parlament, për dy muaj qeveria aktuale do të dështojë. Në një intervistë për “Bulevard VIP”, avokati Ngjela sqaron dhe motivet përse nuk do të funksionojë kjo qeverisje: “Për dy arsye; e para, sepse kanë dështuar zgjedhjet dhe opozita nuk është në Parlament... Dhe e dyta, është fakti se kemi një qeveri pa program dhe që nuk janë në gjendje që të bëjnë program. Të dyja bashkë do ta rëndojnë situatën”. Më tej, Ngjela komenton edhe çështjen ‘Mediu’, duke pohuar se juridikisht Gjykata e Lartë nuk kishte zgjedhje tjetër veç të mbyllte çështjen ‘Mediu’. Përfshirjen e Fatmir Mediut në qeveri, Ngjela e cilëson si një arkaizëm dhe injorancë... Partia Ligj dhe Drejtësi nuk u bë pjesë e Parlamentit të ri. Si ishte pritshmëria juaj për këto zgjedhje dhe e kishit menduar ndonjëherë këtë rezultat? Ende nuk dihet se sa real ishte rezultati i zgjedhjeve. Kështu që nuk di sa vota reale ishin tonat. Këta nuk na lanë të shikonim votat, sesa njerëz votuan për ne. Unë kam bërë fushatë vetëm në tre qytete, Tiranë, Lezhë dhe Korçë. As në Tiranë nuk mund të shikoje sesa është forca jote, dhe as më tej. Unë mendoj se të dyja partitë, edhe Partia Socialiste dhe Partia Demokratike, kanë marrë votat në drejtim të tyre, PS-ja ka marrë majtas, PD-ja djathtas, të paktën kjo mendohet deri tani. Unë kam kërkuar dhe .vazhdoj të kërkoj hapjen e kutive, është domosdoshmëri hapja e kutive. Fakti që Partia Demokratike ngulmon që të mos hapen kutitë, kuptohet që ka diçka brenda. Sa më shumë të vonohet hapja e kutive, aq më shumë njerëzit do të dyshojnë se zgjedhjet kanë qenë të manipuluara.

Si e vlerësoni ju bashkëqeverisjen PD-LSI dhe si e parashikoni të ardhmen e këtij koalicioni?
Kam përshtypjen se do të jetë e dështuar. Për dy arsye; e para, sepse kanë dështuar zgjedhjet dhe opozita nuk është në Parlament dhe mendoj se do të vazhdojë të rrijë gjatë jashtë tij. Dhe e dyta, është fakti se kemi një qeveri pa program. Krejtësisht pa program dhe jo vetëm që është pa program, por nuk janë në gjendje që të bëjnë program. Të dyja bashkë do ta rëndojnë situatën. Sepse, në rast se do të ishte dështimi i zgjedhjeve, por do të kishte një program ambicioz të saktë në funksion të tregut dhe ekonomisë në përgjithësi dhe të reformës institucionale, natyrisht që do të zbutej fakti i parë, por me këtë lloj programi të dyja faktet, edhe ai i dështimit të zgjedhjeve dhe ky i paaftësisë qeveritare do të bashkohen, dhe sigurisht do të sjellin rrëzimin e kësaj qeverie.

LSI-ja dhe Ilir Meta duket se dolën më të fituarit e këtyre zgjedhjeve. Dinakëria e Metës në marrjen e tre ministrive tepër të rëndësishme si dhe postin e zv/kryeministrit do të funksionojë apo parashikoni pakënaqësi nga të dy krahët rrugës?
Jo, nuk ma ha mendja se do të ketë konflikt mes të dy palëve. Por, në qoftë se çështja do të degradojë kështu siç ju thashë më sipër, atëherë vetë Meta do të largohet, sepse fundoset bashkë me një anije e cila nuk është e tija. Megjithatë, do të shikojmë se si do të precipitojnë gjërat.
Kryetarja e Parlamentit, Jozefina Topalli e cilësoi zgjedhjen e kabinetit të Berishës me mjaft zgjuarsi, duke e paralelizuar me zgjedhjen e kabinetit të Nikolas Sarkozi. Jeni dakord me këtë paralelizëm?
Është njëlloj sikur të krahasosh Francën me Shqipërinë. Është e kotë t'i hyjmë këtij lloj diskutimi. Nuk mund të ketë paragon midis Francës dhe Shqipërisë, janë dy gjëra shumë të largëta. Kjo tregon mungesë kulture nga ana e asaj që e ka thënë.

Për sa i përket çështjes "Mediu", ju si jurist i njohur në vend, si e gjykoni vendimin e Gjykatës së Lartë për pushimin e çështjes dhe reagimin e Prokurorisë së Përgjithshme?
Gjykata e Lartë ka pasur të drejtë, sepse nuk vepronte dot gjyqësisht me faktin që Fatmir Mediu tashmë është me imunitet. E vetmja rrugë ishte kjo, megjithëse legjislacioni ynë nuk është perfekt, procedurat tona janë me mangësi, të gjitha këto duhet të kishin gjetur zgjidhje paraprake nëpërmjet ligjit. Fakti që legjislacioni ynë nuk është perfekt, ligjet janë me kontradiksion me njëri-tjetrin dhe ndodhi kjo që u përjetua nga të gjithë. Por, nuk kishte rrugë tjetër, mendoj unë.

A ka hapësira ligjore për rigjykim të Mediut dhe cilat mund të jenë ato?
Ka. Duhet të kërkojnë heqjen e imunitetit dhe të vazhdojë rigjykimi. Prokuroria duhet të kërkojë heqjen e imunitetit dhe të vazhdojë sërish gjykimi.

Në këtë situatë, a duhet të ndërhyje Presidenti i Republikës në cilësitë e Kryetarit të Këshillit të Lartë të Drejtësisë, e nëse po, si mund të ndërhyjë?
Jo, Presidenti i Republikës nuk mund të ndërhyjë dot në këtë rast.

Dyshja Mediu-Basha në qeveri shikohet si sfidë e Berishës ndaj opozitës dhe shumicës së opinionit në vend, apo si mundësi për të mbrojtur veten në aferat për korrupsion për të cilat akuzohet vetë Berisha?
Kam përshtypjen se ka shumë gjëra brenda. Nuk është çështja aq e thjeshtë, janë interesa në një krah, por edhe injorancë në krahun tjetër. Është arkaizëm për një qeverisje moderne që të veprojë kështu, por ja që ky është rasti shqiptar, nuk kemi çfarë t'i bëjmë. Ky është një kryeministër i cili për faktin që manipulon votat, natyrisht që nuk ndjen përgjegjësi ndaj popullit të vet. Por, mendoj se ka ardhur koha që forca do të vendosi në vend gjërat.

Tashmë në politikën amorfe shqiptare, bashkëpunimi i kundërshtarëve Berisha-Meta u vlerësua si befasi. Sipas jush, a mendoni se në këtë bashkëjetesë është "dora" e Nanos dhe ambicia e tij e përfolur për t'u bërë President?
Jo, nuk besoj. Është një interes dypalësh mes kreut të qeverisë, Sali Berisha dhe liderit të Lëvizjes Socialiste për Integrim, Ilir Meta. Ndryshe nuk bëhej dot qeveria. Ai (Meta) i dha të drejtën e qeverisë, ky (Berisha) i dha të drejtën e posteve, është e njëjta situatë si në çdo aferë. Si në çdo aferë, dhe kjo është një lidhje biznesi, më jep të të jap. Me 70 deputetë nuk bëhej dot maxhoranca. Ilir Meta i dha maxhorancën dhe i mori beneficën e kësaj. Kaq kemi deri këtu. E rëndësishme është të mendojnë sesi do të qeverisin këta të dy. Kjo duhet pritur. E megjithatë, nuk ma ha mendja se duhet pritur që kjo qeveri ta kapë vjeshtën. Dy kushtet që u thashë me sipër do t'i shikoni që do të spikasin shumë shpejt.

Në këtë kuadër, kundërshtarët e Ramës në PS (Blushi, Malaj...), kërkojnë rinovimin e PS-së, apo kanë qëllime personale apo të një grupi të caktuar?
Nuk di çfarë të them. Fakte në këtë rast nuk kemi. Në funksion të rrëzimit të qeverisë 'Berisha' dhe të manipulimeve zgjedhore luajnë gabim, se luajnë në favor të Berishës. Është naiviteti apo është intencioni, këtë nuk e di. Që të dyja janë të barazvlefshme për politikën.
Jeni shprehur se "opozita ka të drejtë të kërkojë numërimin e votave", gjë e cila kundërshtohet prerë nga Berisha e Meta. Sipas jush, a mjafton ky motiv për të përligjur bojkotin e shpallur të Parlamentit?
Unë kam deklaruar që bojkoti është me vlerë, është akt me vlerë dhe e konsideroj si të vetmen zgjidhje për të rikthyer shpresën se do të vendoset demokracia në Shqipëri. Duhen hapur kutitë.

Si e shikon veten Ngjela dhe partia e tij në këtë situatë që po kalon vendi? A ekziston mundësia e një bashkëpunimi (qoftë dhe të përkohshëm) me partitë e majta që mbështesin Ramën për problemin e zgjedhjeve të fundit parlamentare dhe legjitimitetin e Parlamentit e qeverisë?
Duhet të jemi realist, ne jemi forcë opozitare, pavarësisht nga sensi, siç e kërkojmë ne, e kërkojnë si të majtët edhe të djathtët hapjen e kutive. Duhet të kuptojmë që Partia Ligj dhe Drejtësi, që përfaqësoj unë, nuk ka gjë në dorë për të ndryshuar gjendjen, as për të krijuar rinumërimin e votave, as për të rivendosur drejtësinë në funksion të procesit zgjedhor. Ata janë parti e madhe, kanë 65 deputetë dhe prandaj unë i kam përkrahur. Të mos qenit në Parlament dhe të mos folurit nga foltorja e Parlamentit na largon diçka, më largon mua, por që gjithsesi unë do të vazhdoj jetën time politike. Unë do të vazhdojë të përkrah idenë se në qoftë se opozita nuk hyn në Kuvend për dy muaj, dy muaj e gjysmë, kjo qeveri nuk mund të rezistojë më.