Turpërimi në Kupë, mediat duan “kokën” e Pelegrinit.

Pelegrini largohu! E vështirë të jesh më i qartë. Ka qenë ky titulli i madh i të përditshmes “Marca” pas humbjes turpëruese në shifrat 4-0 që Reali i Madridit pësoi në Kupë nga skuadra modeste e Alcorcon, e cila militon në Segunda B në Spanjë (kategoria e tretë).

Ajo që konsiderohet si skuadra më e madhe në botë u mund nga një formacion i një lagje 13 kilometra larg Madridit, madje me një rezultat që lë shumë pak vend për diskutime. Gjatë natës duke u gdhirë e mërkura, në mediat spanjolle thuajse të gjithë pjestarët e Realit janë përpjekur të kërkojnë falje, duke nisur nga trajneri Pelegrini, Guti apo Raul. Të tre kanë folur për një turp, megjithatë tashmë mediat kërkojnë edhe largimin e trajnerit kilian që drejton galaktikët. “Pelegrini bie me gjithë skuadrën”, është një titull tjetër i “Marcas”.

Ndërkohë sipas të përditshmes “AS”, Pelegrini ka dy ndeshje afat për të përmirësuar situatën, atë me Getafen të shtunën në kampionat dhe derbin me Atletikon javën e ardhshme. “Gjëja më qesharake e shekullit”, është titulli i kësaj gazete në faqen 2 referuar disfatës madrilene. Edhe gazetat politike i kanë kushtuar një rëndësi të madhe disfatës së galaktikëve. “El Mundo” titullon: “Alcorcon galaktike, Pelegrini marsian”, duke e quajtur turp atë që ndodhi të martën me Realin. Ndërsa “El Pais” nuk kursehet: “Galaksia e Florentinos thërrmohet në Alcorcon”.

Natyrisht, në një humbje të tillë të Realit, gazetat më të lumtura kanë qenë ato të Barcelonës. “Poshtërim historik” është titulli i “AS”, ndërsa “El Mundo Deportivo zgjedh një fjalë të vetme: “Poshtërim”. “AS” flet gjithashtu për një ultimatum për Pelegrinin, duke shkruar se kiliani i ka tashmë orët të numëruara. Ndërsa “El Mundo Deportivo” komenton: “Reali bëhet sërish qesharak në Kupë, madje mund të pësonin një goleadë akoma më skandaloze. Një skuadër e Segunda B shkatërron projektin milioner dhe prepotent madrilen”. Madje, kjo gazetë ia kushton 4 faqet e para kësaj disfate, duke e quajtur një tërmet atë që ndodhi në Alcorcon.