Aksident tragjik në Krujë, 6 të vdekur.

KRUJE- Një aksident tragjik ka ndodhur rreth orës 20:15 në aksin rrugor Fushë Krujë-Lac pranë fshatit Derven.

Burime nga policia bëjnë të ditur se 6 persona kanë humbur jetën si pasojë e përplasjes së një ambulance të Lacit me një automjet tip Benz me targa të Tiranës 1579 A.

Sipas policisë, në autoveturë udhëtonin 5 persona ndërsa viktima e gjashtë është shoferi i ambulancës.
Dy prej pasagjerëve janë dërguar me urgjencë në spital, por nuk kanë mundur të mbijetojnë për shkak të plagëve të rënda. Ende nuk është bërë i ditur identiteti i viktimave.

Shpejtësia tej normave të lejuara mendohet të ketë qenë shkaku i këtij aksidenti. Autoambulanca udhëtonte nga Laci ne drejtim të Tiranës, ndërsa benzi në krah të kundërt. Përplasja ka ndodhur pranë fshatit Derven.
Policia ka mbërritur menjëherë në vendngjarje dhe po punon për zbardhjen e shkaqeve të aksidentit tragjik që i kushtoi jetën 6 personave.