Vret burrin, 62-vjeçarja: Prishte lekët kot

Konflikti me bashkëshorten i ka kushtuar jetën një 66-vjeçari, i cili u godit prej saj me thikë në zemër. Ngjarja ndodhi dy net më parë në lagjen “18 Shtatori” në Gjirokastër kur Dituri Meni, 62 vjeçe dyshohet se ka vrarë me thikën e bukës burrin e saj Flamur Meni, 66 vjeç. Pas ngjarjes ajo njoftoi familjarët e saj, të cilët e transportuan me urgjencë drejt spitalit rajonal në Gjirokastër, ku deklaruan se Meni tentoi të vriste veten. I moshuari ndërroi jetë

pak minuta më pas, ndërsa mjekët e spitalit njoftuan policinë dhe i bënë të ditur se nuk bëhet fjalë për vetëvrasje, pasi plaga është shkaktuar nga një tjetër person. Në këto rrethana policia shoqëroi gruan e të ndjerit e cila pranoi autorësinë e vrasjes. Ndaj saj u mor masa e arrestit për “Vrasje në familje”.

Krimi

Bashkëshortet Dituri dhe Flamur Meni kishin pasur shpeshherë debate mes tyre pasi ky i fundit kthehej vonë në shtëpi dhe konsumonte alkool. 62-vjeçarja nuk pranonte që burri i saj të konsumonte paratë nëpër lokale ndaj dhe kishte pasur disa herë debate me të. Një gjë e tillë ndodhi edhe rreth orës 21:00 të së shtunës në banesën e tyre që ndodhet në lagjen “18 Shtatori” në Gjirokastër. Flamur Meni kishte dalë në orët e pasdites nga shtëpia dhe kur u kthye bashkëshortja e tij ka konstatuar se ai vinte erë alkool. Ajo i ka kërkuarparatë që ai kishte marrë në shtëpi, por 66-vjeçari i tha se i kishte prishur me shokët. Kaq është dashur që mes tyre të nisë sërish një debat i ashpër. Policia dyshon se pas fjalëve fyese të ndërsjella, Meni mund të ketë ngritur dorë mbi gruan e tij.

Kjo e fundit ka rrëmbyer më pas thikën e bukës dhe e ka goditur një herë në zemër bashkëshortin, i cili është rrëzuar menjëherë në dysheme i gjakosur. Pas këtij krimi, 62-vjeçarja njoftoi familjarët e saj, të cilët bënë të mundur transportimin e të plagosurit drejt spitalit të Gjirokastrës. “Ka qenë e pamundur shpëtimi i të plagosurit pasi ai kishte marrë një plagë në zemër dhe ndërroi jetë pak minuta më pas”-thanë mjekët e spitalit, të cilët njoftuan policinë. “Grupi hetimor dhe eksperti mjeko-ligjor kanë kryer gjatë natës veprimet paraprake, ku në ndihmë të ekspertit mjeko-ligjor, mëngjesin e djeshëm mbërritën nga Tirana një grup ekspertësh të Mjekësisë ligjore dhe, nga këqyrja që iu bë kufomës, rezultoi se shkaku i vdekjes ka ardhur si pasojë e goditjes me thikë në zemër”- deklaroi Policia e Shtetit.

Dëshmia

Pas hetimeve të para rezultoi se viktima ishte qëlluar me thikë nga një tjetër person. Policia ngriti dyshime mbi bashkëshorten e të ndjerit, e cila u shoqërua në ambientet e komisariatit të policisë së Gjirokastrës. “Me çiftin jeton edhe djali i tyre, por u verifikua se, në momentin që ka ndodhur ngjarja, ai nuk ndodhej në banesë. Dyshimet u ngritën mbi 62-vjeçaren Dituri Meni, e cila pranoi autorësinë e krimit”- thanë për “Shekullin” burimet policore. Ajo u tha oficerëve të policisë kriminale se bashkëshortin e qëlloi pas një debati të fortë me të, ndërsa u shpreh se ai e kishte goditur. “Burri im nuk ishte i disiplinuar.

Ai vinte vonë në shtëpi dhe pinte alkool. Dilte pasdite nga shtëpia dhe i harxhonte lekët nëpër lokale dhe në mbrëmje kthehej i dehur. Mes nesh kishte pasur edhe herë të tjera debate, por kësaj herë ai më qëlloi. Mu errësuan sytë dhe mora një thikë. Nuk desha ta vrisja, por kisha frikë pasi ai mu vërsul” mësohet të ketë thënë në polici 62-vjeçarja Dituri Meni. Pas marrjes në pyetje ndaj të dyshuarës u mor masa e arrestit për veprën penale të ‘Vrasjes në familje”.