Adi Krasta:"Ethe akoma me te forta"

Ndoshta as vetë Adi Krasta nuk e kishte menduar se “Ethet” do të rikthefshin pas dy vjetësh më të forta se më parë. Sepse duket, që në këto ditë jo shumë të ftohta dimri, shumë prej të rinjve shqiptarë kanë nisur të përjetojnë ethet për të provuar sukses. Dhe ky fakt e bën prezantuesin e njohur Adi Krasta të bindet dhe të shprehet se kjo ka qenë një formulë e pagabueshme.
“Pas tre vjetësh pushim, thuajse në të gjitha rrethet kemi gjetur një atmosferë shumë më të mirë se ethet e para. Kjo më bën të them që formula ka qenë e pagabueshme”.
E ndërsa vazhdon audicioni në rrethet kryesore të vendit, stafi që punon për këtë shoë është i njëjtë. Emrat e njohur të Zhani Cikos, Zerina Kukes, Shpëtim Saraçit dhe Alfred Kaçinarit, gjejnë mbështetjen e regjisorit Pali Kuke, ndërsa gjithçka vjen nën drejtimin e Adi Krastës. E ndërsa është shprehur veçanërisht i surprizuar nga zërat dhe talentet e të rinjve në qytetin e Shkodrës, në një bisedë telefonike, prezantuesi është shprehur se stafi i këtij show do të udhëtojë jo vetëm brenda Shqipërisë, por ka si pikëmbërritje edhe Tetovën e Prishtinën.
I pyetur nëse në këtë fluks interesash për “Ethet” ka ndikuar edhe fakti që shfaqjet do të transmetohen në ekranin e “Top Channel”, Krasta është shprehur: “Sigurisht Top Channel është një garanci më shumë, megjithatë dua të them që në disa prej qyteteve, ku ne kemi shkuar deri tani, sinjali i këtij televizioni është ndërprerë”.
Edhe pse i gjithë ky impenjim ka në thelb zbulimin e talenteve të reja në muzikë, shfaqjet ku do të bëhet performanca e të përzgjedhurve do të kenë edhe elemente të tjerë të spektaklit. Në 17 nëntor çdo të shtunë do të nisë transmetimi i shfaqjeve të audicionit, ndërsa me përfundimin e tyre do të nisin e shfaqjet e mëdha, që do të transmetohen ditën e dielë