SHERR NE PUB PLAGOSEN TRE TE RINJ

TIRANË- Një sherr me pasojë plagosjen e tre personave ka ndodhur në një prej pubeve të kryeqytetit. Nga burimet policore mësohet se ngjarja ka ndodhur tek pub “Tivoli”, në afërsi të Liqenit Artificial, kur tre persona u përleshën me leva me njëri-tjetrin dhe për pasojë mbetën të plagosur rëndë. Në vendngjarje mbërritën menjëherë forcat policore të Patrullave të Përgjithshme të lajmëruara në rrugë telefonike prej dëshmitarëve, të cilët ndonëse u përpoqën që ta shmangnin këtë sherr, nuk mundën t’ia arrinin. Nga burimet e policisë mësohet se, pasi janë mbledhur të gjitha dëshmitë e personave të pranishëm, por edhe të protagonistëve të këtij sherri është vënë në pranga një person i quajtur Aleks Lala, ndërsa është arrestuar edhe një person tjetër me mbiemrin Frashëri. Ngjarja, sipas të njëjtave burime policore, ka ndodhur në orën 04.00 të ditës së djeshme, ndërsa ende po verifikohen shkaqet që çuan në këtë përplasje me leva. Të dyja palët e konfliktuara u përpoqën që të mos e mbanin përgjegjësinë për këtë ngjarje dhe deklaruan se ishin përpjekur që sherri të mos degradonte deri në atë shkallë. Gjithsesi, grupi hetimor po punon për të gjetur personat që e shkaktuan këtë sherr, ndërsa mësohet nga burimet spitalore se gjendja shëndetësore e të plagosurve nuk paraqitet e rënduar dhe pas kurimit të menjëhershëm në spital ata mund të shkojnë në shtëpitë e tyre, për shkak se plagët nuk ishin shumë të rënda. Në policinë e Tiranës, thuajse përditë vijnë denoncime për sherre masive dhe shumica e tyre nuk publikohen për shkak të motiveve banale dhe plagosjeve tepër të lehta që të lënduarin marrin. Gjithsesi është shtuar edhe forca patrulluese e policisë, e cila nuk ka lejuar që ndonjë rast të degradojë në tragjedi dhe ndërhyrjet kanë qenë tepër efikase dhe kjo falë edhe bashkëpunimit të komunitetit, i cili informon policinë.