Vrasja e Kosta Trebickes

TIRANE-Vdekja e Kosta Trebickës, përkundër sigurisë së zyrtarëve se ishte një aksident i rëndomtë automobilistik, ka ngjallur dyshime dhe mister në opinionin e specialistëve të policisë. Ndërsa në televizione ende vijonin të shfaqeshin minutazhet speciale në kujtim të 10-vjetorit të vrasjes së Azem Hajdarit, lajmi për vdekjen e biznesmenit u përhap me shpejtësi duke “ngujuar” para ekranit shumëkënd që ishte në dijeni të faktit, se ishte Trebicka që denoncoi i pari aferën e municioneve nga Shqipëria drejt Afganistanit. Sikurse edhe Gërdeci, episodet e të cilit u renditën prej medias, edhe aksidenti (apo vrasja) e Trebickës prodhoi të njëjtën dinamikë. Grupi i “ekspertëve” të policisë, pothuajse gjatë gjithë kohës dhanë deklarata kontradiktore për vendndodhjen e trupit të viktimës, rrotullimet e makinës, nëse ishte vetëm apo jo, madje vunë në dyshim dhe nëse i vdekuri ishte biznesmeni Trebicka apo jo. Dilema nëse bëhet fjalë për aksident apo për vrasje ka zënë vend gjatë gjithë ditës, pasi vetë Kosta Trebicka ishte shprehur gjatë një interviste televizive, se ndihej i kërcënuar. Por më shumë se të gjithë, janë punonjës dhe drejtues të policisë, që bazuar në morinë e lajmeve, pamjeve filmike dhe “përzgjedhjes” së detajeve të ngjarjes, mundohen të argumentojnë se nuk bëhet fjalë thjesht për një aksident automobilistik. Njëri prej drejtuesve të Rendit, me një eksperiencë shumëvjeçare për ngjarje të rënda kriminale, dje ka rrëfyer dyshimin e tij se ikja e Trebickës nga kjo botë nuk ishte aksidentale.
Si një ekspert policie me shumë eksperiencë, mendoni se vdekja e biznesmenit Kosta Trebicka erdhi thjesht si pasojë e një aksidenti automobilistik?
Nuk mendoj se bëhet fjalë për një aksident. Kam dyshime të forta rreth kësaj ngjarjeje të mistershme. Kam ndjekur për orë të tëra pamjet e transmetuara në mediat vizive dhe bazuar në përvojën time, them se nuk ishte aksident.
Mund të na e argumentoni dyshimin tuaj?
Dyshimi i parë lidhet me faktin se sado i apasionuar të jesh pas gjuetisë, nuk mund të shkosh i vetëm, qoftë dhe në një zonë që e njeh mirë. Por është mënyra e ndodhjes së aksidentit ajo që të shton vetvetiu dyshimet dhe hipotezat për një vrasje të mundshme.
Zyrtarisht u deklarua se makina e Trebickës bëri një rrotullim të vetëm. Nëse është vërtetë kështu, është e pamundur që mjeti të ishte i ndezur. Po kështu, është e pamundur që trupi i viktimës të jetë disa metra larg makinës. Trupi duhej të ishte pas makinës, pasi bëhet fjalë për një mjet që pas rrotullimit vazhdon lëvizjen për inerci. Një tjetër detaj që shton dyshimet është arma e gjahut. Është e pamundur që çiftja të ndodhej 1.5 metra larg kufomës.
Keni argument tjetër më të fortë që provon dyshimet e tua si ekspert policie?
Dhe një sy i lirë dhe për më tepër i një profesionisti të fushës së policisë, duhet t’i ketë bërë përshtypje pozicioni i kufomës. Duket sikur kufoma është vënë me dorë në mes të rrugës. Në raste të tilla aksidentesh, trupi nuk duhej të ishte në atë pozicion. Madje të bën shumë përshtypje fakti që koka ishte në pozicionin nga lind dielli.
Cili është konkluzioni i një eksperti në fushën e krimeve?
Dyshoj për vrasje, por me ekzekutor jo profesionistë

(balkanweb)