Operatori i katërt celular, qeveria shkeli rekomandimet e BE

• Duke dhënë licencën e operatorit të katërt celular pa tender, qeveria ka shkelur rekomandimet në BE për fushën e telekomunikacioneve. Këto rekomandime përcaktojnë qartë se licencat duhet të jepen detyrimisht me tender. Ndërkohë qeveria ia ka dhënë pa garë licencën e operatorit të katërt celular për 15 vjet Post Telekomunikacionit të Kosovës, që në fakt është vetëm përfaqësuesi i katërt ofertuesve të tjerë, kompani biznesi në Shqipëri.

TIRANE- Qeveria ka shkelur direktivat e Bashkimit Europian në fushën e telekomunikacioneve duke dhënë liçensën e operatorit të katërt celular pa procedurë tenderimi. Në rekomandimet e Bashkimit Europian dhe Unionit Ndërkombëtar të Telekomunikacioneve përcaktohet qartë se brezat “GSM” jepen detyrimisht me tender. Ndërkohë që qeveria i ka dhënë në përdorim frekuencën për 15 vjet Post Telekomunikacionit të Kosovës, i cili ka vetëm 30 për qind të aksioneve në këtë blerje. Post Telekomunikacioni i Kosovës në fakt është vetëm përfaqësuesi i katër ofertuesve të tjerë, kompani biznesi në Shqipëri, midis të cilëve “Union Group”, “Infosoft Sistem”, “Albania Drink Distribution” dhe “ACI Engineering”

Qeveria shpalli fitues bashkimin e ofertuesve përfaqësuar nga Posta e Kosovës edhe pse kjo ishte e vetmja kompani në tenderin e 20 shkurtit të këtij viti, që në fakt i dështoi për mungesë konkurrence.
Duke përzgjedhur këtë kompani, qeveria nuk ka zbatuar edhe dokumentin e politikave në fushën e telekomunikacioneve, në të cilin është qartësisht e shkruar se duhet të respektohen direktivat e BE-së dhe rekomandimet e organizmave që kanë të bëjnë me fushën e telekomunikacioneve. Për dhënien e së drejtës së përdorimit të frekuencës në Shqipëri është miratuar një vendim qeverie që është në fuqi, i datës 10 nëntor 2008, ku në pikën 21 shprehet qartësisht sesi duhet vepruar në rastin kur tenderi ka dështuar për shkak të mungesës së konkurrencës, ashtu siç ndodhi në tenderin e datës 20 shkurt të këtij viti për licencën e operatorit të katërt celular.

Në pikën 21 të këtij vendimi theksohet se “për të vazhduar procesin e përzgjedhjes së fituesit, në vijim të procedurës së tenderit duhet që numri i ofertave të vlefshme të jetë më i madh se numri i të drejtave të përdorimit të frekuencave që tenderohen. Në të kundërt, ndërpritet procedura dhe fillon një procedurë e re. Agjencia Kombëtare e Prokurimeve Elektronike përpara fillimit të procedurës së re, sipas parashikimit të pikës 21.1 të këtij kreu, analizon shkaqet që shkaktuan dështimin e procedurës së parë dhe i korrigjon ato me qëllim që të bëjë të mundur rritjen e konkurrencës.

Por qeveria nuk ka zbatuar asnjë nga këto pika, duke ofruar liçensën e operatorit të katërt celular me prokurim të drejtpërdrejtë, çka do të thotë pa garë dhe në mungesë të plotë të konkurrencës.
Dhënia e frekuencës për 15 vjet bashkimit të ofertuesve përfaqësuar nga Posta e Kosovës është në kundërshtim të plotë me ligjet shqiptare në fuqi dhe me rekomandimet e institucioneve ndërkombëtare, drejt së cilave ne synojmë integrimin.