Deputeti i vrarë, sekuestrohen lejet e ndërtimit.

• Deputeti i Ps, Xhindi kishte blerë tokë për të ndërtuar një pallat. Për të vërtetuar nëse ka pasur përplasje me ndonjë firmë tjetër ndërtimi, Prokuroria ka sekuestruar të gjithë praktikën e dhënies së lejeve të ndërtimit.

FIER-Zbarkon në Bashkinë e Fierit grupi i punës që po heton për zbardhjen e vrasjes së deputetit të Partisë Socialiste, Fatmir Xhindi. Dy prokurorë të Krimeve të Rënda si dhe një oficer i policisë gjyqësore në Fier kanë sekuestruar dje lejet e ndërtimit të dhëna nga Bashkia gjatë viteve të fundit. Burime pranë grupit të hetimit thanë se, një veprim i tillë u ndërmor vetëm dy ditë pasi në Hipotekë u zbulua se deputetit i ndjerë, Xhindi kishte blerë një sipërfaqe toke prej 500 m2 dhe kishte nxjerrë lejen për ndërtimin e një pallati në një nga lagjet e qytetit të Fierit.

Për të mbikëqyrur punimet dhe ecurinë e këtij aktiviteti ndërtimi, deputeti kishte caktuar si administrator një person të besuar të tij, me të cilin kishte lidhje krushqie. Për të vërtetuar nëse ka pasur përplasje me ndonjë firmë tjetër ndërtimi, Prokuroria ka sekuestruar të gjithë praktikën e dhënies së lejeve të ndërtimit në këtë qytet.

Kur ka kaluar një javë nga ekzekutimi i deputetit Xhindi, në derën e shtëpisë së tij, në qytezën e Roskovecit, Prokuroria është përqendruar kryesisht tek pista e vrasjes për motive pronësie. Pavarësisht se familjarët e hodhën poshtë një mundësi të tillë. Fatmir Xhindi u ekzekutua me shtatë plumba mbrëmjen e së shtunës së kaluar, në derën e shtëpisë së tij nga persona ende të panjohur.