ISHP: Nuk ka virus në Shqipëri, analizat rezultuan negative.

Nuk ka grip derrash në Shqipëri. Ky është rezultati i analizave të pacientit të dyshuar me virusin A/H1N1 në QSUT. Sipas Institutit të Shëndetit Publik analizat kanë rezultuar negative, cka do të thotë se virusi A/H1N1 nuk ka mbërritur në Shqipëri. Pacienti do të ekzaminohet për të zbuluar shkaqet e simptomave të tij, të ngjashme me ato të gripit të derrave. Mësohet se personi është i moshës rreth 50 vjec, funksionar i lartë në Ministrinë e Jashtme i cili sapo kishte mbërritur nga një udhëtim pune nga Siria.

TIRANE-Ora 20:02- Funksionari i Ministrisë së Jashtme, i cili ishte shtruar në spitalin infektiv në QSUT nuk rezulton të jetë i prekur nga gripi i derrave. Sipas Institutit të Shëndetit Publik analizat kanë rezultuar negative, cka do të thotë se virusi A/H1N1 nuk ka mbërritur në Shqipëri.
E kontaktuar në telefon nga televizioni “News24” , shefes së departamentit të kontrollit të sëmundjeve infektive në Institutin e Shëndetit Publik, Silva Bino bëri të ditur se në Shqipëri nuk ka virus, dhe rezultatet e analizave të personit që dyshohej me simptoma të gripit të derrave kanë rezultuar negative.
“ Analizat laboratorike kanë rezultuar negative, kjo gjë e përjashton mundësinë e mbërritjes se gripit në vendin tonë” theksoi Bino.
Sipas ISHP pacienti i dyshuar me virusin H1N1 nuk është futur në karantinë, ndërkohë që do të ekzaminohet për të zbuluar shkaqet e simptomave të tij, të ngjashme me ato të gripit të derrave.
Një rast i dyshuar me H1N1 në Tiranë. Priten analizat

Ora 10:10- Një rast i dyshuar me gripin e derrit është evidentuar sot në Qëndrën Spitalore Universitare në Tiranë (QSUT) “Nënë Tereza”. Ministria e Shëndetësisë konfirmoi se një rast i dyshuar me virusin A/H1N1 ishte paraqitur sot ne infektivin e QSUT. Personi i dyshuar që ndodhet i shtruar në raportin e infektivit është izoluar dhe po i nnështrohet analizave dhe ndodhet larg kontaktit me të sëmurët e tjerë. Instituti i Shëndetit Publik bëri të ditur se rasti mbetet ende nën statusin e të dyshuarit pasi janë analizat ato që do të vërtetojnë nëse bëhet fjalë për virusin e rrezikshëm A/H1N1.
Mësohet se personi është i moshës rreth 50 vjec, funksionar i larte tek Ministria e Jashtme por emri nuk behet i ditur ne respekt te privatesise. Mesohet se ai sapo kishte mbërritur nga nje udhetim pune nga Siria. Personi kishte temperaturë, dhimbje koke, barku dhe të vjella, të njëjtat simptoma që ka edhe ky grip i rrezikshëm që po kërcënon botën.
Dyshimi, flet kreu i Infektivit: Do presim rezultatin e analizave te pacientit
Pas publikimit të lajmit se një rast i dyshuar me gripin e derrit është evidentuar në Shqipëri, ka reaguar menjëherë Reparti i Infektivit në QSUT. Drejtori i Repartit të Infektivit, Gazmend Bejtaj sqaroi se tani nuk mund të të flitet përvecse për dyshim, pasi do të jetë rezultati i analizave që do të vërtetojë nëse bëhet fjalë për një rast me A/H1N1. Bejtaj vuri në dukje se është në procedurë të punës të tyre të ekzaminojnë cdo rast me temperaturë të lartë, ashtu sic po veprohet edhe në rastin e dyshuar. Bejtaj tha se personi i dyshuar si i sëmurë me grip derrash tani i është nënshtruar analizave.

Situata ne rajon
Virusi i gripit H1N1 tashmë se është përhapur dhe në Ballkan. Rumania ka identifikuar dhe konfirmuar sot rastin e parë të personit të infektuar me virusin H1N1 ndërsa Greqia konfirmoi rastin e tretë, ndërsa 4 raste të tjera janë të dyshimta.

Greqi
Ministria e Shëndetësisë konfirmoi sot rastin e tretë të virusit të gripit H1N1, ndërsa katër raste të tjera janë të dyshuar. Ministri i Shëndetësisë, Dimitris Avramopoulos tha se pacienti i infektuar është një student 20 vjecar nga Selaniku dhe ishte identifikuar nga telekamerat termike në aeroportin e Athinës ndërsa kthehej nga një udhëtim në Edinburg, Skoci.

Rumani
Bukureshti identifikoi dhe konfirmoi sot rastin e parë të infektuar me virusin e gripit H1N1. Ministri rumun i Shëndetësisë Ion Bazac deklaroi se personi i infektuar është një grua 30-vjeçare, e cila ishte kthyer nga Nju Jorku javën e kaluar.
Gruaja kishte jetuar për disa kohë në SHBA dhe u shtrua së bashku me tre të afërm të saj në një spital në Bukuresht.