Meta: Marrëveshja me Berishën eshte e hapur.

• Kryetari i partisë Lëvizja Socialiste për Integrim, ka deklaruar se koalicioni i partisë së tij me “Aleancën për Ndryshim” ka si qëllim integrimin e vendit. “Marrëveshja me Berishën do të jetë e hapur”- theksoi Meta. Këtë deklarate kreu i LSI-së e bëri gjatë një interviste dhënë për VOA. Ndër të tjera ai shtoi se ka refuzuar ofertën e Ramës për tu bërë kryeministër me vota të trafikuara.

TIRANE-Kryetari i Lëvizjes Socialiste për Integrim Ilir Meta, ka shprehur sërish bindjen me koalicionin me Partinë Demokratike, si një zgjidhje për integrimin e vendit dhe kapërcimin e krizës ekonomike. Duke folur për Zërin e Amerikës, Meta ndërsa shpjegoi se elektorati do ta kuptoj këtë koalicion, nga ana tjetër shtoi se kishte refuzuar ofertën e Ramës për ta bërë atë kryeministër me vota të trafikuara në kampin e djathtë.

“Më vjen keq që kryetari i PS-së vazhdon të sillet në mënyrë hipokrite dhe kalon në sulme personale, ndërkohë që duhet të mbajë premtimin e tij për këtë humbje e cila është e tija personalisht. Pasi ka qenë ai që ka insistuar për Kodin, i cili i ka humbur të majtës 12 mandate. Ka qenë ai që ka përjashtuar cdo tentativë për bashkëpunimin që i është ofruar nga ne. Nga 70-cja e opozitës të më propozonte mua për kryeministër dhe ai të na siguronte disa vota të trafikuara nga maxhoranca e djathtë, në mënyrë që të largonim Berishë. Kjo gjë u refuzua nga ana ime, pasi kjo nuk mund të pranohej nga askush. Dhe cdo përpjekje për ta anatemuar këtë koalicion është jo vetëm arkaike, por i takon të kaluarës, është jo vetëm folklorike por edhe antikombëtare”- theksoi kreu i LSI-së Meta.

Meta ka shtuar se lideri i Partisë Socialiste është përgjegjës për humbjen e së majtës në zgjedhjet e 28 qershorit dhe se ka dëmtuar Lëvizjen Socialiste për Integrim në këto zgjedhje. Por duke folur për pozicionin e tij në krye të Lëvizjes Socialiste për Integrim, pasi kishte premtuar të merrte mbi 30 mandate para zgjedhjeve, Meta tha se do të jenë forumet e partisë që do të vendosin.

“Unë jam i hapur për çdo vendim të forumeve të partisë Lëvizja Socialiste për Integrim dhe cdo gjë do ta vendosin forumet e kësaj partie. Në vjeshtë ne do të kemi një ripërtëritje të të gjithë strukturave të Lëvizjes Socialiste për Integrim, përfshi këtu edhe postin e kryetarit të kësaj lëvizjeje dhe padyshim unë do ti nënshtrohem vullnetit të këtyre strukturave” – theksoi Ilir Meta.

Meta nuk foli për ministritë që do të ketë LSI në këtë qeveri, por tha se marrëveshja do të jetë tërësisht e hapur.