Mjeku i Dritan Dajtit: Do mbetet i paralizuar.

Dritan Dajti, autori i masakrës së 7 gushtit në Durrës, rrezikon të lidhet përjetë pas karrocës me rrota. Një plumb që e ka goditur në kolonën vertebrale i ka paralizuar këmbën e majtë. Ka gjasa që gjendja e të shumëkërkuarit të përkeqësohet më tej dhe paraliza të jetë e pakthyeshme nëse nuk i jepet ndihmë e specializuar mjekësore. Drejtori i spitalit të burgut, Ylber Vata tha se, "Dritan Dajti ka të paralizuar këmbën e majtë, por vetëm mjekët do të vendosin nëse i paraburgosuri do t'i nënshtrohet ndërhyrjes kirurgjikale". I dënuari për vrasjen e biznesmenit Agim Beqaj dhjetë vjet më parë, ka një tjetër plumb në kofshën e djathtë, në të cilën ka humbur ndjeshmërinë në masën 80 për qind. Sipas burimeve nga spitali i burgut, Dajti ka dalë jashtë rrezikut për jetën. Por, nëse nuk merr mjekim të specializuar rrezikon të paralizohet.

Rreziku
Tri plumba që derdhën efektivët e policisë mbi të shumëkërkuarin pasi kishte qëlluar për vdekje katër kolegët e tyre, duket se po i kushtojnë mjaft shtrenjtë Dritan Dajtit. Një prej plumbave e ka prekur në kolonën vertebrale, duke i shkaktuar paralizimin e këmbës së majtë. "Ka shumë rrezik që i paraburgosuri të mbetet i paralizuar në këmbën e majtë. Në këmbën e djathtë, për shkak të një plumbi që ka në kofshë, ka humbur ndjeshmërinë në masën 80 për qind, por ka shpresa për shërim. Do të jenë mjekët specialistë që do të vendosin nëse të plagosurit do t'i hiqen dy plumbat që ka në trup. Nuk mund të themi ende nëse paraliza në këmbën e majtë është apo jo e shërueshme", - tha një burim nga spitali i burgut. Dajti i është nënshtruar një ndërhyrje në spitalin e Durrësit, por mjekët kanë mundur t'i heqin vetëm një plumb që e kishte zënë në krah, duke i lënë në trup dy plumba të tjerë. Zyrtarë të spitalit të burgut shprehen se nuk është në dorën e tyre, por janë mjekët ata që duhet të thonë fjalën e fundit dhe të vendosin për fatin e të paraburgosurit.

Ndërhyrja
Një ndërhyrje e specializuar kirurgjikale do të ishte e vetmja mundësi që Dritan Dajti të mos përfundojë përjetë i paralizuar. Asgjë nuk mund të thuhet me saktësi, por fakti që autori i masakrës nuk ka marrë mjekim të specializuar e ka rënduar së tepërmi gjendjen e tij. Në fakt, i akuzuari për vrasjen e katër punonjësve të policisë u shpreh në Gjykatën e Krimeve të Rënda se ishte keqtrajtuar nga policia në momentin e arrestimit, si dhe nuk po mjekohet si duhet në spitalin e burgut. Autoritetet e këtij institucioni thonë se brenda mundësive që disponon spitali Dritan Dajtit i është dhënë kurim. Për shkak se ka dy plumba në trup ende të pa hequr, ai ka nevojë për mjekim të specializuar. Dritan Dajti nuk është i vetmi i paraburgosur që ka plumba në trup dhe që ka nevojë urgjente për ndërhyrje kirurgjikale të specializuar. Ilir Paja, një tjetër emër i njohur i botës së krimit, i cili u qëllua nga policia teksa tentoi ta arrestonte, ka një plumb shumë pranë zemrës dhe nuk dihet se kur do të vendosin mjekët për t'ia hequr.