Greqi, emigranti shqiptar vdes nga gripi i derrave.

nga **Andi** 2009-09-04, 23:39

Gripi i derrave ka shënuar viktimën e parë shqiptare. Ai është 25-vjeçari Jani Metushi, emigrant në Greqi, i cili e kishte marrë virusin pandemik gjatë pushimeve në ishullin Paros të shtetit helen. 25-vjeçari është shtruar në spital në gjendje të rëndë që nga data 19 gusht, por duke qenë se ai kishte edhe probleme kardiake, virusi A/H1N1 i ka shkaktuar komplikacione të rënda deri në mosfunksionim të shumë organeve jetike, gjë që ka rezultuar fatale për të. Aktualisht në Greqi numri i të prekurve nga virusi A/H1N1 është 2000 persona, duke qenë kështu vendi me numrin më të madh të të prekurve në të gjithë rajonin.

Vdes Emigranti
25-vjeçari Jani Metushi, i cili kurohej nga gripi i derrave prej ditësh në gjendje të rëndë në spitalin Evangjelizmo të Athinës, ka gjetur vdekjen ditën e djeshme. Emigranti shqiptar është shtruar në këtë spital urgjentisht në datën 19 gusht, pasi është konstatuar se është infektuar nga gripi i derrit gjatë pushimeve në ishullin Paros të Greqisë. Pas kësaj ai ka shfaqur shenja, si vështirësi në frymëmarrje dhe është konstatuar se ky virus i ka shkaktuar pneumoni të rëndë në mushkëri. Ditë më vonë, në sintezë edhe me historikun e rëndë shëndetësor të tij, pasi 25-vjeçari vuante prej kohësh nga probleme kardiake, madje përdorte edhe aparat për aritminë në zemër, virusi i gripit të derrit i ka shkaktuar komplikacione të tjera shëndetësore.

Midis tyre, në orët e fundit virusi i gripit pandemik i ka shkaktuar 25-vjeçarit edhe mosfunksionim të shumë organeve jetike, gjë që ka çuar në vdekjen e tij. Rasti i emigrantit shqiptar ishte një prej dhjetë rasteve serioze të gripit të derrit në vend. 25-vjeçari, i cili jetonte me dokumente të rregullta në Greqi, u shtrua fillimisht në spitalin e Athinës për probleme serioze në zemër, por menjëherë është transferuar në repartin e mjekimit intensiv, pasi ka rezultuar pozitiv ndaj virusit të gripit të derrit. Pak ditë më parë, një 23-vjeçar nga Greqia i cili kishte probleme serioze me zemrën, vdiq nga komplikacionet që ishin shkaktuar nga virusi i gripit të derrit. Në Greqi, numri i përgjithshëm i të prekurve me virusin A/H1N1 ka arritur në gati 2000 persona, pasi vetëm javën e fundit u regjistruan 157 raste. Sipas organeve greke, niveli i përhapjes së virusit në dhjetëditëshin e fundit është pak më i ulët se në muajt e kaluar.