12 vite që mbledh kanoçe, nuk kam lekë për kontroll te mjeku

Që në moshën 15-vjeçare ai u detyrua të punonte e kjo e pengoi të vazhdonte shkollën. Atë e braktisi shumë herët, ndërsa sot që ka mbushur 27 vjeç numëron plot 12 vite punë duke mbledhur kanoçe e bidonë. Fakti që shumë biznesmenë kanë investuar në industrinë e riciklimit i ka mundësuar Gentit edhe mbledhjen e mbetjeve plastike,

por pavarësisht kësaj ai pohon se pagesat kanë ardhur në ulje. “Isha i detyruar të merresha me këtë punë. Punova ca kohë në ndërtim, por ata morën njerëzit e vet dhe më thanë s’ka më punë. Jam interesuar edhe për punë të tjera, por u bë gati 2 vjet që s’më ka marrë njeri. Tani u hap dhe kjo mbledhja e bidonëve, por më parë na kanë paguar më shumë”, shprehet i riu.
Babai i një fëmije 2-muajsh tregon se çdo ditë është i detyruar të mbledhë mbi 20 kilogramë mbetje për të fituar të paktën 500 lekë, por këto para’, ndonjëherë nuk i mjaftojnë as për të ushqyer veten dhe familjen. “Për 1 kilogram na paguajnë 200 lekë të vjetra. Tani problem kemi edhe këto motorët e transportit sepse nuk po na lenë”, shprehet Genti, ndërsa shton se për shërbime e plotësim nevojash shtesë ‘as që bëhet fjalë’. 27-vjeçari është i vetëdijshëm se puna që bën është e rrezikshme për shëndetin e ndaj përdor edhe doreza për të shmangur kontaktin e drejtpërdrejtë me mbeturinat, por kontrollet te mjeku nuk ka mundësi t’i paguajë. “Tani dhe po more ndonjë infeksion s’ke ç’bën. Të shkosh nëpër spitale të thonë paguaj faturën 10000 lekë, jo kështu… dhe unë s’kam mundësi”, shprehet Genti e teksa flet, shfrytëzon kohën për të nxjerrë ndonjë bidon plastik nga kazani i mbeturinave.