Skuadra K.F Elbasani

• Ka reaguar kryebashkiaku i Elbasanit për rënien nga Superliga të ekipit të këtij qyteti. Kështu Sejdini ka hedhur akuza për trukim të ndeshjes dhe i ka kërkuar FSHF-së të nis hetimet ndaj futbollistëve. Sejdini e ka quajtur një turp për futbollistet e politikanët të cilët sipas tij kanë ndikuar me anë të trukimeve të ndeshjes për rënien nga kategoria.

ELBASAN- Akuza të forta nga kampi i Elbasanit pas rënies së skuadrës në kategorinë e dytë. Kryetari i Bashkisë Qazim Sejdini akuzoi futbollistët e ekipit dhe kërkoi nga Federata që të hetojë trukimet e bëra në ndeshjet e tjera, duke zbatuar nenin 23 të rregullores që i dënon këto ekipe me zbritje nga kategoria.

“Ky është një turp i madh, i cili nuk vjen nga keqmemaxhimi i klubit, por vjen nga këto futbollist që mbahen për gjeneral, por nuk janë as ushtarë, që dinë vetëm të kërkojnë dhe nuk japin asgjë në fushën e lojës. Është turp për ta që njollosin fanellën e këtij qyteti”- u shpreh Sejdini.

Sejdini tha se asnjë nga futbollistët nuk do të largohet nga klubi i Elbasanit, pavarësisht se mbaron kontrata pa realizuar penalitetet. Ku sipas tij në këto penalitete përfshihet 30 për qind e pagës vjetore, si dhe një hetim që do të nisë ndaj futbollistëve.

“Një tjetër hetim do të kryhet edhe nga Federata Shqiptare e Futbollit, e cila do ti thotë njëher e mirë larg politikës dhe trukimeve nga futbolli që këto tre javët e fundit u bë realitet”- tha Sejdini.

Ndërkohë, akuza të forta edhe për ministrat dhe politikanët, që për arsye të votave, kanë ndërhyrë për trukimin e ndeshjeve të futbollit. “Më vjen shumë keq për ata ministra të kujdo krahu ti përkasin për shkak të votave të tyre elektorale të fusin duar në kampionatin e futbollit”- tha Sejdini.