Rama: Shqipëria në krizë, shteti po degradon

TIRANE- Përmes një konference për mediat, kreu socialist Edi Rama shprehu shqetësimin për situatën ekonomike të vendit duke deklaruar se Shqipëria është në krizë të gjithanshme ndërsa sipas tij arka e shtetit ka mbetur bosh.

Duke folur për hërë të parë për rastet cnjerëzore të trajtimit të njerëzve me probleme mendore, të zbuluara së fundmi nga mediat, Rama konsideroi se këto raste janë dëshmi e varfërisë që ka përfshirë vendin, ndërkohë që fajëson strukturat e shtetit për dështim të plotë me politikat sociale.

“Shqiptarët po përballen me degradimin çdo ditë e më shumë, kriza finaciare që i prek çdo ditë është dëshmi e këtij degradimi. Këto ditë opinioni është ballafaqur me ngjarje cnjerëzore, njerëzit trajtohen si në mesjetë për shkak të varfërisë. Pamjet shokuese në Dibër dhe Fier tregojnë jo vetëm shkallen e varfërisë por dështimin e plotë të strukturave të shtetit” u shpreh Rama përpara mediave.

Sipas kryesocialistit, përvec krizës financiare vendi përballet edhe me atë që ai e quajti krizën më të thellë morale të qeverisjes.
“Rindarja në mënyrë abuzive e pronave për interes të familjes qeveritare dhe klientëve të saj, strehimi në qeveri i përgjegjësve për shpërthimin e Gërdecit, përplasja e dy policive në Fier, janë fakte absurde për një vend që po troket për të marrë statusin e kandidatit në BE” tha Rama.

Duke ripërsëritur bindjen për të cuar deri në fund “betejën” për transparencën e zgjedhjeve të 28 qershorit, Rama lajmëroi protestën e radhës të socialistëve dhe mbështetësve të saj, e cila do të organizohet nesër në Lushnjë.

“Njerëzit janë të bindur se situate e vendit mund të ndryshojë duke vazhduar betejën për zbardhjen e maskaradës së 28 qershorit dhe për të krijuar kushte që në Shqipëri të kemi një ndryshim real dhe rrenjësor. Nesër në Lushnjë do të vazhdojmë protestat” theksoi kreu socialist.